မကွေး၊ ပေါက်မြို့နယ်တွင် တစ်ရက်တည်းမှာပင် တော်လှန်ရေးရဲဘော် ၂၁ ဦး ကျဆုံး

7 months ago

“ထိန်းနိုင်နေတဲ့အချိန်မှာမှ ကိုယ့်ကလေးတွေက ကျွံသွားတာ။ ကလေးတွေ ဘော်ဒီလေးလောင်း ပြန်ရတယ်။ ကျန်တဲ့ကလေးတွေ ကျကုန်တယ်။ အားလုံး ၂၁ ယောက်ပေါ့။ ကျွံသွားတဲ့ ကလေးတွေ အကုန်ကျသွားတယ်”
မြိုင် ပကဖ တာဝန်ခံ ဗိုလ်လက်ယာ
============
နိုဝင်ဘာ ၁၇
မကွေးတိုင်း၊ ပေါက်မြို့နယ် အတွင်းရှိ ဇီးပြားရွာ ရဲစခန်းနှင့်ပျူရွာများအား တော်လှန်ရေးရဲဘော်များက ဝင်ရောက်တိုက်ခိုက်ခဲ့ရာမှ တော်လှန်ရေး ရဲဘော်၂၁ ဦး ကျဆုံးခဲ့ရကြောင်း သိရသည်။
“တိုက်ပွဲက ခြောက်ရက်ကြာတယ်။ နိုဝင်ဘာ ၁၀ ရက်ကတည်းက စခဲ့တာ။ ဒီပျူရွာမှာ အိမ်ခြေက ၆၀၀၊ ၇၀၀ လောက်ရှိတယ်။ တဖြည်းဖြည်းကပ်ရာကနေ ထိန်းမိသွားတဲ့ အချိန်ပေါ့။ ပထမဆုံးက ရဲဘော်နှစ်ဦး ကျတာပါ။ ကျတာကတော့ နိုဝင်ဘာ ၁၅ မှာ။ ဘန်ကာဝင်စီးချိန် စကျတာ။ နှစ်ယောက်ကျပြီးမှ အထဲမှာ ၁၉ ယောက် ကျသွားပါတယ်။ ဘန်ကာတွေကလည်းများ၊ သူတို့က တော်တော် ကြီးတဲ့ ပျူရွာဆိုတော့ ဘန်ကာ အများကြီး၊ ရာဂဏန်းလောက်ကို ရှိပါတယ်။ ကျဆုံးရဲဘော်တွေက အခုပါတဲ့ အဖွဲ့တွေထဲကပါ။ တစ်ဖွဲ့ကို တစ်ယောက်ကျ၊ နှစ်ယောက်ကျပေါ့လေ။ လုံးဝမကျတဲ့အဖွဲ့တွေလည်း ရှိပါတယ်။ ထိန်းနိုင်နေတဲ့အချိန်မှာမှ ကိုယ့်ကလေးတွေက ကျွံသွားတာ။ ဘော်ဒီက လေးလောင်းပြန်ရတယ်။ ကျန်တဲ့ကလေးတွေ အထဲမှာ ကျကုန်တယ်။ အားလုံး ၂၁ ယောက်ပေါ့။ ကျွံသွားတဲ့ကလေးတွေ အကုန်ကျသွားတယ်” ဟု မြိုင် ပကဖ တာဝန်ခံ ဗိုလ်လက်ယာ က Spring of Burma Media သို့ပြောသည်။
အဆိုပါ တိုက်ပွဲမှာ နိုဝင်ဘာ ၁၀ ရက်မှ စတင်ဖြစ်ခဲ့သော တိုက်ပွဲဖြစ်ကြောင်းနှင့် နိုဝင်ဘာ ၁၀ ရက်ညတွင် အကြမ်းဖက် စစ်ကောင်စီမှ ကင်းထောက်ဒရုန်းအား ပစ်ချခဲ့ပြီး ဒရုန်းလာကောက်သော အကြမ်းဖက်စကစ လက်အောက်ခံများအား တော်လှန်ရေးတပ်ဖွဲ့များက တိုက်ခိုက်ခဲ့ရာ နှစ်ဦးသေဆုံးခဲ့ကြောင်း၊ ယင်းနောက် အကြမ်းဖက်စစ်ကောင်စီက နိုဝင်ဘာ ၁၀ ရက် မှ ၁၄ ရက် အထိ ငါးရက်ဆက်တိုက် အီနာဂါအလုံး ၁၀၀၀ခန့်ဖြင့် နေ့မနား ညမနား တိုက်ခိုက်ခဲ့၍ ရှေ့တန်းရဲဘော်များမှ ပေါက်မြို့နယ်၊ ဇီးပြားရွာ ရဲစခန်းနှင့် ပျူရွာများအား စတင်ချဉ်းကပ် တိုက်ခိုက်ခဲ့ခြင်းဖြစ်ကြောင်းလည်း သိရသည်။
“ပျူရွာက အရှေ့ဘက်နဲ့ အနောက်ဘက်ရှိတယ်။ အဲဒီမှာရဲစခန်းရှိတယ်။ စ-တွေရှိတယ်၊ ပျူတွေရှိတယ်။ အနောက်ဘက်ကလည်း ပျူတွေပဲ။ နှစ်ရွာပေါင်းပျူအင်အားတော်တော်များတာ။ ကျွန်တော်တို့ ဇီးပြားရွာကို ဝင်လိုက်တော့ ပျူတွေ တော်တော်များများကို ထိန်းမိသွားပြီ။ ပျူတွေလည်းအတော်လေးထွက်ပြေးတာ ဘာညာတွေလုပ်နေပြီ။ အဲဒီအချိန် ကိုယ့်ကလေးတွေက ကျွံသွားတာပေါ့။‌ သူတို့ ပိတ်ဖမ်းတယ် ဘာညာ မဟုတ်ပါဘူး။ အနောက်ကလည်း ကိုယ့်ဘက်က ထိန်းထားနိုင်ပြီဆိုပြီး နေရာယူမှုအရမ်း အားနည်းသွားခဲ့တာကြောင့်ပါ။ ကျဆုံးရဲဘော်တွေ စျပနက ပြီးသွားပါပြီ”ဟု ဗိုလ်လက်ယာက ဆက်၍ပြောခဲ့သည်။
အဆိုပါ တိုက်ပွဲအား မြိုင် ပကဖ တပ်ရင်း ၁၊ ၂ နှင့် ပေါက်ကျေးရွာ ပကဖ တပ်ဖွဲ့များ ၊ YRF( ပေါက်) ၊ Earthquake Defence Force ၊ တောင်ညိုနဂါးတပ်ဖွဲ့ ၊ Royal 7 တပ်ဖွဲ့ တို့က တိုက်ခိုက်ခဲ့ခြင်းဖြစ်ကာ နိုဝင်ဘာ ၁၅ ရက် နံနက် ၅ နာရီ အချိန်တွင် ဇီးပြားရဲစခန်းနှင့် ပျူရွာအား ဝင်ရောက်တိုက်ခိုက်ခဲ့ပြီး ဇီးပြား ပျူရွာအတွင်းရှိ ဘန်ကာများ၊ ဘူတာရုံရှိ ဘန်ကာများအားလုံး သိမ်းဆည်းနိုင်ခဲ့ကြောင်း၊ ပျူများ စခန်းချနေသော အဆောက်အဦများကိုလည်း မီးရှို့ဖျက်ဆီးခဲ့ကြောင်း၊ တိုက်ခိုက်မှုကြောင့် အကြမ်းဖက်စစ်ကောင်စီ လက်အောက်ခံ စစ်၊ ရဲ၊ ပျူများအပါအဝင် စုစုပေါင်း ၄၀ ခန့် သေဆုံးပြီး ရှေ့ထွက်မိုင်း ၅ လုံး၊ လက်ပစ်ဗုံး ၈လုံး သိမ်းဆည်းရရှိခဲ့ကြောင်းနှင့် တိုက်ပွဲဖြစ်နေချိန်အတွင်း ရန်သူ့ဘက်မှ Mi – 35 ဖြင့် လေကြောင်းပစ်ကူများစွာ လာရောက်ခဲ့ကာ Rocket များ၊ စက်လက်များဖြင့် ပစ်ခတ်ခဲ့ပြီး ပေါက် ကပစ (၂၄) မှ ၁၂၀ မမ လက်နက်ကြီးပစ်ကူ အကြိမ်ရေ ရာဂဏန်းအထိ ပစ်ခတ်တိုက်ခိုက်ခဲ့ကြောင်း သိရသည်။

ကန့်ဘလူ၊ ညောင်ဇင်လေးရွာမှ တက်လာသော ပျူများအား တော်လှန်ရေးအဖွဲ့များ ပူးပေါင်း ပစ်ခတ်တိုက်ခိုက်၊ ထိခိုက်မှုများ ရှိနိုင် (ရုပ်သံ)

7 months ago

နိုဝင်ဘာ ၁၇
ကန့်ဘလူမြို့နယ်၊ ညောင်ဇင်လေးရွာမှ တက်လာသော ပျူများအား တော်လှန်ရေးအဖွဲ့များပူးပေါင်း၍ ပစ်ခတ်တိုက်ခိုက်ခဲ့ရာ ထိခိုက်မှုများ ရှိနိုင်ပြီး ၎င်းပျူများ ပြန်ဆုတ်ခွာသွားကြောင်း ပြည်သူ့လွတ်မြောက်ရေးတပ်မတော် (PLA) က ထုတ်ပြန်ထားသည်။
နိုဝင်ဘာ ၁၅ ရက်‌နေ့က ညောင်ဇင်လေး(ပျူ)ရွာမှ ညောင်ဇင်ကြီးရွာဘက်သို့ တက်လာသော ပျူများအား ပြည်သူ့လွတ်မြောက်ရေးတပ်မတော် (PLA) နှင့် ဒေသတွင်း တော်လှန်ရေးအဖွဲ့များ ပူးပေါင်း၍ ပစ်ခတ်တိုက်ခိုက်ခဲ့ခြင်းဖြစ်ကြောင်း သိရသည်။
“အင်အား နှစ်ဆယ်ကျော်၊ သုံးဆယ်လောက်လောက် တက်လာတာ။ သေနတ်တွေပစ်ပြီး တက်လာတာ။ ကျွန်တော်တို့ဘက်က လက်နက်ကြီးလက်နက်ငယ်တွေ ဝိုင်းပြုံပြီး ပြန်ပစ်တာ။ ဒီကောင်တွေ ရှေ့တက်မလာရဲတော့ဘူး။ သေချာနေရာယူပြီး ပြန်ပစ်တာ အထိအခိုက်ရှိနိုင်တယ်။ တမနက်လုံးနီးပါး အပြန်အလှန်ပစ်ကြတာ။ ကျွန်တော်တို့ဘက်တော့ အထိအခိုက်မရှိဘူး” ဟု (PLA) ရဲဘော်တစ်ဦးက ပြောသည်။
အဆိုပါ တိုက်ခိုက်မှုအပြီးတွင် စကစဘက်က ဟောင်ဝင်ဇာဖြင့်ပစ်သဖြင့် မင်းကုန်းရွာနှင့် ညောင်ဇင်ကြီးရွာတို့တွင် ကျရောက်ပေါက်ကွဲပြီး ပြည်သူများ အထိတ်တလန့်ဖြစ်ကြရ‌ကြောင်း သိရသည်။
ညောင်ဇင်ကြီးရွာသည် ညောင်ဇင်လေး၊ သင်ပေါင်းကျင်း(ပျူ)ရွာတို့နှင့် နယ်နိမိတ် ဆက်စပ်နေသောကြောင့် အမြဲတစေ စကစလက်ပါးစေ ပျူများ၏ ​နှောင့်ယှက်တိုက်ခိုက်ခြင်းကိုခံနေရ၍ လယ်ယာစိုက်ပျိုးရေးလုပ်ငန်းအများစုကိုပစ်ပယ်ထားရသည့်ရွာ ဖြစ်ကြောင်း သိရသည်။
ကန့်ဘလူနယ်သည် ပျူအားကောင်းသည့်နယ်ဖြစ်ပြီး တော်လှန်ရေးရဲဘော်များလည်း စစ်ရေးသတိအမြဲရှိနေကြရကာ ထိတွေ့တိုက်ပွဲများလည်း မကြာခဏ ဖြစ်နေကြရကြောင်းလည်း သိရသည်။

လွိုင်ကော်ထောင် ရပြီ ဆိုသော သတင်းမှားယွင်း သတင်းအမှားများကြောင့် မြေပြင်တော်လှန်ရေး ရဲဘော်များနှင့် ပြည်သူများ အထိနာနေရ

7 months ago

“ထောင်ထဲကို ကျွန်တော်တို့ မဝင်နိုင်သေးတာကို ထောင်ရနေပြီ ၊ ဘာညာဆိုပြီး လုပ်နေ ပြောနေတဲ့ အုပ်စုလေးရှိတယ်။ အဲဒီတော့ ကျွန်တော်တို့ပဲ အဖိခံရတာပေါ့။ လေယာဉ်တွေတောက်လျှောက် လာတော့တာပေါ့”
ပြည်သူ့ကာကွယ်ရေးတပ်၊ ဒီးမော့ဆို
==============
နိုဝင်ဘာ ၁၆
ကရင်နီပြည်အတွင်း မြို့သိမ်းတိုက်ပွဲများနှင့် ထိုးစစ်များဆောင်ရွက်နေချိန်တွင် ယခုရက်ပိုင်းအတွင်း ထွက်ပေါ်လာ သော လွိုင်ကော်ထောင်ရပြီ၊ ထောင်သားများ လွတ်ပေးလိုက်ပြီဆိုသော သတင်းအမှားများကြောင့် ဒေသခံ ပြည်သူများနှင့် တော်လှန်ရေးတပ်ပေါင်းစုများ လေယာဉ်ဖြင့် အဆက်မပြတ် အဖိခံနေရကြောင်း သိရသည်။
“ထောင်ထဲကို ကျွန်တော်တို့ မဝင်နိုင်သေးတာကို ထောင်ရနေပြီ ဘာညာဆိုပြီး လုပ်နေပြောနေတဲ့ အုပ်စုလေးရှိတယ်။ အဲဒီတော့ ကျွန်တော်တို့ပဲ အဖိခံရတာပေါ့။ လေယာဉ်တွေတောက်လျှောက်လာတော့တာပေါ့။ မနေ့ညကဆို တစ်ညလုံး၊ ဒီနေ့လည်း တနေကုန် တစ်စင်းပြီး တစ်စင်း၊ တစ်စင်းသွားတာနဲ့ တစ်စင်းပြန်လာတဲ့ အထိပဲ” ဟု ပြည်သူ့ကာကွယ်ရေးတပ်၊ ဒီးမော့ဆိုမှ တာဝန်ရှိသူက Spring of Burma Media သို့ နိုဝင်ဘာ ၁၅ ရက်တွင် ပြောခဲ့သည်။
မြန်မာတစ်နိုင်ငံလုံး အတိုင်းအတာအရ ထိုးစစ်များနှင့် မြို့သိမ်းတိုက်ပွဲများစွာ တပြိုင်တည်း ဆင်နွှဲနေချိန်တွင် သတင်းအမှန်များနှင့်အတူ သတင်းအမှားများလည်း ရောထွေးထွက်ပေါ်လာကြောင်းနှင့် အဆိုပါ သတင်းအမှားများမှာ အမှန်တကယ် မှားယွင်းပြောခြင်းများ ရှိနေသလို ပြည်သူများနှင့် တော်လှန်ရေး ရဲဘော်များ ထိခိုက်မှုများစေရန်အတွက် ရည်ရွယ်ချက်ရှိရှိ တမင်ဖြန့်ဝေနေသည့် သဘောများလည်း ပါနေ၍ အထူးသတိပြုသင့်ကြောင်းလည်း သိရသည်။
“တောက်လျှောက် ကြဲနေတာ။ ဒေါဥထူ ရပ်ကွက်တို့၊ ဘာဒိုမှာဆို အရင်ကတည်းက စကစ ဘက်က မထွက်ခိုင်းတာရှိတယ်။ကျွန်တော်တို့က ရွာတွေထဲ ပြည်သူတွေ ရှိတယ်လည်း မသိ၊ တံခါးသော့ခတ်ထားတော့လေ။ ဒါပေမယ့် အထဲကနေ အသံကြားတော့ အထဲက ဘယ်သူလဲ ဘာလဲ မေးတော့မှ မြန်မာအသံမဟုတ်ဘဲ တိုင်းရင်းသားအသံကြားတော့မှ အထဲကနေ ကျွန်တော်တို့ ထွက်လို့ရပြီလားမေးလို့ ထွက်လို့ရပြီဆိုပြီး ထွက်ခိုင်းရတာတွေ ရှိတယ်။ မနေ့ညက လေယာဉ်လာကြဲတော့ ပြည်သူအများကြီး ထိတယ်။ သေလည်း သေကြတယ်။ ဒေါဥခူဘက်က ပြည်သူတစ်ယောက် သေတယ်။ သေဆုံးသူ အမျိုးသားအလောင်းပြန်ရဖို့ တော်တော်ကြိုးစားခဲ့ရတယ်။ စကစနဲ့ ကပ်နေတဲ့ နေရာဖြစ်တော့ ပြည်သူအလောင်းပြန်ရဖို့ ကျွန်တော်တို့ရဲဘော်တစ်ယောက်တောင် ထိသွားရတယ်။ အလောင်းပြန်ရဖို့ နည်းနည်း ထိုးစစ်သဘော တိုက်ရတော့ ထိတာပေါ့” ဟု ပြည်သူ့ကာကွယ်ရေးတပ်၊ ဒီးမော့ဆိုမြို့နယ်မှ တာဝန်ရှိသူက ဆက်၍ ပြောခဲ့သည်။
လေယာဉ်ဖြင့် ဗုံးကြဲတိုက်ခိုက်မှုများကြောင့် ဒေါဥခူရပ်ကွက် နှင့် ဘာဒို စသော နေရာများတွင် ပြည်သူအိုးအိမ် များစွာ ထိခိုက်ပျက်စီးခဲ့ရကြောင်းနှင့် ဒေါဥခူရပ်ကွက်ရှိ သာသနာ့အဆောက်အအုံ၊ လွိုင်ကော်ရှိ အထင်ကရဖြစ်သော ဒေါဥခူ စာသင်တိုက်ကြီးလည်း အထိအခိုက်များစွာဖြင့် ပျက်စီးခဲ့ရကြောင်း သိရသည်။
ရုပ်သံ (ပေးပို့) – စကစ၏ လေကြောင်းတိုက်ခိုက်မှုကြောင့် ထိခိုက်ထားသော ပြည်သူများအား ရဲဘော်များကယ်ထုတ်နေပုံနှင့် ထိခိုက်ပျက်စီးမှုများ။

လွိုင်ကော်တက္ကသိုလ်ဝန်းတွင် တိုက်ပွဲများ နှစ်ရက်ဆက်တိုက် ပြင်းထန်၊ လက်ကျန် အကြမ်းဖက် စစ်ကောင်စီတပ်ဖွဲ့ဝင်များ KNDF ထံ လက်နက်ချ (ရုပ်သံ)

7 months ago

နိုဝင်ဘာ ၁၅
ကရင်နီပြည်၊ လွိုင်ကော်တက္ကသိုလ်ဝန်းထဲ၌ တပ်စွဲထားသော တပ်မ(၆၆)လက်အောက်ခံ ခမရ (၄၂၅) နှင့် ခမရ (၆) တပ်ရင်းတို့အား KNDF စစ်ကြောင်းမှ အပြီးသတ်ချေမှုန်းကာ နောက်ဆုံးလက်ကျန် တပ်ဖွဲ့ဝင် ၃၀ ကျော် KNDF ထံ လက်နက်ချ အညံ့ခံခဲ့ကြောင်း သိရသည်။
“ဟုတ်ပါတယ်။ ၃၀ ကျော် အညံ့ခံလာပါတယ်။ ကျန်တာကထုတ်ပြန်ချက်ထဲက အတိုင်းပါပဲ”ဟု ကရင်နီပြည်မှ တပ်ဖွဲ့ဝင် တစ်ဦးက ပြောသည်။
နိုဝင်ဘာ ၁ရက်တွင် လွိုင်ကော်တက္ကသိုလ်ဝန်းအတွင်း တပ်စွဲ ကာ ကျန်ရှိနေသော ခမရ (၆)မှ တပ်ဖွဲ့ဝင်များအား KNDF မှ အပြီးသတ်ချေမှုန်းရန် စစ်ဆင်ရေးအား နံနက်ပိုင်းမှ စတင်ခဲ့ပြီးနောက် ညနေပိုင်းတွင် ကျန်ရှိစစ်ကောင်စီတပ်ဖွဲ့များအား လက်နက်ချအညံ့ခံရန် KNDF ဘက်မှ အခွင့်အရေးပေးခဲ့ပြီးနောက် တပ်ခွဲမှူး “ကောင်းမြတ်ကို” (ကြည်း – ၄၆၅၉၇) ဦးစီးသော စစ်ကောင်စီတပ်သား ၃၂ ဦး လက်နက်ချ အညံ့ခံခဲ့ကြောင်း KNDF က ထုတ်ပြန်ထားသည်။
“၁၁.၁၁ စစ်ဆင်ရေး”၏ အစိတ်အပိုင်းတစ်ခုအဖြစ် KNDF စစ်ကြောင်း၏ တတိယနေ့ နိုဝင်ဘာ ၁၃ ရက်နှင့် စတုတ္ထနေ့ နိုဝင်ဘာ ၁၄ ရက် စစ်ဆင်ရေးများတွင် လွိုင်ကော်တက္ကသိုလ်ဝန်းထဲ၌ တပ်စွဲထားသော စစ်ကောင်စီ၏ ခမရ(၄၂၅) တပ်ရင်းမှူးနှင့် ဒု-ရင်းမှူး အပါအဝင် တပ်ရင်းတစ်ရင်းလုံးနီးပါး သေဆုံးခဲ့ပြီး ခမရ(၆)၏ အင်အား တဝက်နီးပါးကိုပါ ချေမှုန်းခဲ့ကြောင်းလည်း သိရသည်။
အဆိုပါစစ်ဆင်ရေးတွင် လွိုင်ကော်တက္ကသိုလ်၌ တပ်စွဲထားသည့် စစ်ကောင်စီတပ်ရင်း ၂ ရင်းမှ တပ်ရင်းမှူးနှင့် ဒု-ရင်းမှူးများအပါအဝင် တပ်ဖွဲ့ဝင် ၁၁၀ ကျော်အား ရှင်းလင်းခဲ့ကြောင်းနှင့် ယင်းစစ်ဆင်ရေးမှ စစ်သုံ့ပန်း ၃၈ ဦး၊ လက်နက်ကြီး၊ လက် နက်ငယ်မျိုးစုံ ၁၂၈ လက်နှင့် ခဲယမ်းပစ္စည်းများအား သိမ်းဆည်းနိုင်ခဲ့‌ကြောင်း၊ လက်နက်ချ အညံ့ခံသည့် စစ်ကောင်စီသုံ့ပန်းများအား KNDF ၏ စစ်ဘက်ဆိုင်ရာအက်ဥပဒေနှင့် သုံ့ပန်းဆိုင်ရာ မူဝါဒများအတိုင်း ခံစားခွင့်ပေးထားကြောင်း ဖော်ပြထားသည်။

စကစဘက်မှ ၃၀ ကျော်သေဆုံးခဲ့သည့် ကွတ်ခိုင်မှ ဒတ်နိုင်း စခန်းသိမ်းတိုက်ပွဲ (ရုပ်သံ)

7 months ago

နိုဝင်ဘာ ၁၅
ရှမ်းပြည်နယ်မြောက်ပိုင်း ကွတ်ခိုင်မြို့နယ်၊ တာမိုးညဲမြို့၊ ဒတ်နိုင်း အကြမ်းဖက်စစ်တပ်စခန်းကို ကချင်လွတ်မြောက်ရေးတပ် KIA က ပြီးခဲ့သည့် နိုဝင်ဘာလ ၁၂ ရက်နေ့က ဝင်ရောက်တိုက်ခိုက်ခဲ့ပြီး ၁၃ ရက်နေ့တွင် အပြီးသတ်သိမ်းပိုက်နိုင်ခဲ့ခြင်းဖြစ်သည်။

လွိုင်ကော်မြို့ရဲစခန်းမှ ရဲအရာရှိတစ်ဦး လက်နက်နှင့်အတူ မိသားစုပါ ခေါ်ဆောင်ပြီး ပြည်သူ့ဘက် ကူးပြောင်းလာ (ရုပ်သံ)

7 months ago

“နောက်ပိုင်းတော့ ကျောင်းဆရာပဲ လုပ်တော့မယ်”
ပြည်သူ့ဘက် ကူးပြောင်းလာသော ရဲအရာရှိ
=====
နိုဝင်ဘာ ၁၅
လွိုင်ကော်မြို့ရဲစခန်းမှ ရဲအရာရှိတစ်ဦး လက်နက်နှင့်တကွ မိသားစုပါ ခေါ်ဆောင်ကာ ပြည်သူ့ဘက်သို့ကူးပြောင်းလာကြောင်း KNDF တပ်ရင်း(၂)က ထုတ်ပြန်ထားသည်။
၂၀၁၈ ခုနှစ်တွင် စတင်တာဝန်ထမ်းဆောင်ခဲ့သော ၎င်းအနေဖြင့် အကြမ်းဖက်စစ်ကောင်စီ၏ အမိန့်အောက်တွင်တာဝန်ထမ်း‌ဆောင်လိုစိတ် မရှိတော့သည်မှာ မှန်သော်လည်း မထွက်ခွာနိုင်ဘဲ ကြိတ်မှိတ်နေထိုင်ဖြစ်ခဲ့သည်မှာ ကြာပြီဟု သူ၏ဇနီးဖြစ်သူက ဆိုသည်။
အာဏာသိမ်းမှုဖြစ်ပြီး‌နောက် လွိုင်ကော်မြို့ရဲစခန်းမှ CDM ပြုလုပ်ခဲ့‌သော ရဲဝန်ထမ်းများတွင် ၎င်း၏ သူငယ်ချင်းအများအပြားပါဝင်ခဲ့ကြောင်း၊ ၎င်းအနေဖြင့် စစ်ကောင်စီလက်က‌ ထွက်လာပြီးပါက တော်လှန်ရေးတပ်ဖွဲ့များက နှိပ်စက်မည်ကိုကြောက်နေခဲ့ကြောင်း ဆိုထားသည်။
“နောက်ပိုင်းကျရင်တော့ ကျောင်းဆရာ လုပ်မယ် စဉ်းစားထားတယ်။ စစ်ရှောင်တွေကို သင်ပေးမယ်” ဟု အဆိုပါ ရဲတပ်ကြပ်က KNDF တပ်ရင်း(၂)၏ မေးမြန်းမှုအပေါ် ပြန်လည် ဖြေဆိုထားသည်။
နိုဝင်ဘာ ပထမပတ်အတွင်း KNDF တပ်ရင်း(၂)ထံ နီးစပ်ရာအဆက်အသွယ်ဖြင့် CDM ပြုလုပ်ရန် ချိတ်ဆက်ခဲ့သည့်အတွက် ထိုရဲတပ်ကြပ်နှင့် မိသားစုကို ဘေးကင်းစွာ ခေါ်ထုတ်နိုင်ခဲ့ကြောင်းနှင့် လက်ရှိတွင် လုံခြုံသည့်နေရာ၌ ထားရှိထားကြောင်း၊ G3 သေနတ်တစ်လက်နှင့်ကျည်အချို့ကို ယူဆောင်ပြီး အပ်နှံခဲ့သည့်အတွက် KNDF မှ ငွေကျပ် သိန်းသုံးဆယ်ကို ပြန်လည်ပေးအပ်ခဲ့ကာ မိသားစုဘဝ ဆက်လက်ရပ်တည်နိုင်ရန်လည်း တပ်ရင်းက ကူညီသွားမည်ဖြစ်ကြောင်း ထုတ်ပြန်ချက်တွင် ဖော်ပြထားသည်။

ထီးချိုင့်မြို့သိမ်းတိုက်ပွဲ ခေတ္တရပ်ဆိုင်းမည်ဟု တော်လှန်ရေးတပ်ဖွဲ့ ထုတ်ပြန်

7 months ago

အကြမ်းဖက်စစ်ကောင်စီ၏ လေကြောင်းမှ အဆမတန်ဗုံးကြဲတိုက်ခိုက်မှုကြောင့် ရက်ပိုင်းအတွင်း ပြည်သူ ၁၀၀ ကျော် သေဆုံးခဲ့ရ
=========
နိုဝင်ဘာ ၁၅
မြို့သိမ်းတိုက်‌ပွဲများ ဖော်ဆောင်နေသည့် စစ်ကိုင်းတိုင်း၊ ကသာခရိုင်ရှိ ထီးချိုင့်တွင် အကြမ်းဖက်စစ်ကောင်စီမှလေကြောင်းအင်အား အလွန်အကျွံသုံးတိုက်ခိုက်၍ ပြည်သူများစွာ သေဆုံးနေရသဖြင့် မြို့သိမ်းတိုက်ခိုက်မှုစစ်ဆင်ရေးများ ခေတ္တရပ်ဆိုင်းမည်ဖြစ်ကြောင်း ထီးချိုင့်ပြည်သူ့ကာကွယ်ရေးမှ နိုဝင်ဘာ ၁၄ ရက် ညတွင် ထုတ်ပြန်ခဲ့သည်။
အဆိုပါထီးချိုင့်မြို့သိမ်းတိုက်ပွဲ စစ်ဆင်ရေးအား ရပ်ဆိုင်းကြောင်း ကြေညာသည့်ညမှ စတင်ရပ်ထားမည်ဖြစ်ကြောင်းနှင့် အကြမ်းဖက်စစ်ကောင်စီအနေဖြင့် မြေပြင်တွင်အ‌ရေးနိမ့်လာသည့် အခြေအနေများကြောင့် လေကြောင်းမှအဆမတန် ဗုံးကြဲတိုက်ခိုက်ခဲ့သဖြင့် ထီးချိုင့်မြို့အတွင်းရှိပြည်သူများ ဗုံးစထိမှန်သေဆုံးခဲ့ရကြောင်း၊ ငါးရက်အတွင်းမှာပင် ပြည်သူ ၁၀၀ ကျော် သေဆုံးခဲ့ရပြီဖြစ်ကြောင်းလည်း အဆိုပါအဖွဲ့၏ ထုတ်ပြန်ချက်အရ သိရသည်။
အကြမ်းဖက်စစ်ကောင်စီတပ်များအနေဖြင့် ပြည်သူအိုးအိမ်များအပေါ် လူမဆန်စွာ လေကြောင်းအင်အားသုံး တိုက်ခိုက်မှုကြောင့် ထီးချိုင့်မှ လူဦးရေ သုံးသောင်းကျော်စစ်ရှောင်ဘဝသို့ ရောက်ရှိနေရကြောင်း၊ လက်ရှိအချိန်တွင် ရဲဘော်များ၏ ထိခိုက်ဒဏ်ရာရ ကျဆုံးမှုအချို့နှင့် အကြမ်းဖက်စစ်ကောင်စီ၏ အပြစ်မဲ့ပြည်သူများအပေါ် အသက်အိုးအိမ်ထိခိုက်မှု များစေရန် ရည်ရွယ်ပြုလုပ်နေခြင်းများကြောင့် မြို့သိမ်းတိုက်ခိုက်မှုအား ခေတ္တရပ်ဆိုင်းထားရခြင်းဖြစ်ကြောင်းလည်း သိရသည်။
အကြမ်းဖက်စစ်ကောင်စီအနေဖြင့် နိုဝင်ဘာလ ၈ ရက်မှစ၍ တစ်ရက်လျှင် ၈ ကြိမ်ထက်မနည်း လေကြောင်း တိုက်ခိုက်မှုများ ပြုလုပ်ခဲ့ကြောင်း၊ Thermobaric bomb များ၊ ပေါက်ကွဲအားပြင်းသော ရုရှားလုပ် KAB-500 Bombs များ၊YAK-130 အမျိုးအစား fighter crafts များအပြင် အခြားသော Mi-35P attack helicopters များ အသုံးပြုကာ မြို့တွင်းအား ဗုံးကြဲတိုက်ခိုက်ခဲ့ကြောင်းနှင့် မပေါက်ကွဲဘဲ ကျန်ရှိနေသော ဗုံးများလည်း တွေ့ရှိထားကြောင်း သိရသည်။
လေယာဉ်ဗုံးစများကြောင့် အိမ်တွင်းပုန်းအောင်းနေကြသော ပြည်သူအများစုမှာ အမည်ဖော်မရအောင် ဆိုးဝါးစွာ သေဆုံးခဲ့ရကြောင်းနှင့် လမ်းမများပေါ်တွင်လည်း သေဆုံးသူအလောင်းများစွာ ရှိနေကြောင်း၊ သေဆုံးသူများတွင် ရဟန်းသံဃာများ၊ သက်ကြီးရွယ်အိုများ၊ မွေးကင်းစ ကလေး သူငယ်များနှင့် အမျိုးသမီးများမှာ ထက်ဝက်ခန့်ပါရှိကြောင်းလည်း ယင်းတပ်ဖွဲ့မှ ထုတ်ပြန်ချက်အရသိရကာ ထီးချိုင့်၏ လက်ရှိမြို့တွင်းအခြေအနေများနှင့်ပတ်သက်၍ ယင်းတပ်ဖွဲ့အား ဆက်သွယ်မေးမြန်းခဲ့သော်လည်း ပြန်လည်ဖြေကြားခြင်း မရှိသေးပေ။

လောက်ကိုင်တွင်ပြည်သူ့ရင်ငွေ့ခိုလှုံလာသောတပ်ရင်း တစ်ရင်းလုံးနှင့်မိသားစုဝင် ၂၆၂ဦးအားဘေးကင်းရာပို့ဆောင်

7 months ago

နိုဝင်ဘာ၁၅
ရှမ်းပြည်နယ်၊ကိုးကန့်အထူး (၁)၊ ရှီးရှမ်းဒေသ၊ မန်လော်ရွာအုပ်စု၊ ရန်ခွမ့်ရွာရှိ အခြေချတပ်ရင်းတစ်ခုဖြစ်သောဒကစ (လောက်ကိုင်)လက်အောက်ခံတပ်ရင်း ခမရ(၁၂၉)မှတပ်ရင်းမှူးဗိုလ်မှူးကျော်ရဲအောင် ဦးဆောင်သည့်တပ်ရင်းတစ်ရင်းလုံးနှင့်တပ်မိသားစုဝင်များကညီနောင်မဟာမိတ် (၃)ဖွဲ့ထံမှတဆင့်ပြည်သူ့ရင်ခွင်ဝင်ရောက်လာခဲ့ကြောင်းသိရသည်။
ပြည်သူ့ရင်ခွင် ခိုလှုံလာသောတပ်ရင်းတစ်ရင်းလုံးနှင့်တပ်မိသားစုဝင်များမှနိုဝင်ဘာ၁၂ရက်၊ညနေ(၈)နာရီ(၃၀) မိနစ်အချိန်တွင်ညီနောင်မဟာမိတ်(၃)ဖွဲ့ထံဆက်သွယ် ၍ဝင်ရောက်လာကြခြင်းဖြစ်ကာတပ်ရင်းမှူးဗိုလ်မှူးကျော်ရဲအောင်ဦးဆောင်သည့်တပ်ရင်းတပ်ဖွဲ့ဝင်၁၂၆ ဦးနှင့်အတူ၊၄င်းတပ်ဖွဲ့ဝင်များ၏မိသားစု၊သားသမီး၊ညီအစ် ကိုမောင်နှမ၁၃၄ ဦး အပါအဝင်စစ်ဘက်အရပ်ဘက်စုစုပေါင်း ၂၆၂ဦးတို့ပြည်သူ့ရင်ခွင်ခို လှုံလာခြင်းဖြစ် ကြောင်းညီနောင်မဟာမိတ် (၃)ဖွဲ့မှသတင်းထုတ်ပြန်ချက်အရသိသည်။
အဆိုပါပြည်သူ့ရင်ခွင်ဝင်ရောက်လာသောတပ်ဖွဲ့ဝင်တစ်ဦးချင်းစီအားမြန်မာကျပ်ငွေ၁၀သိန်းစီပေးအပ်ခဲ့ကာ၊၎င်းတို့၏ မိသားစုဝင် တစ်ဦးချင်းစီကိုလည်းတစ်ဦးလျှင်ကျပ်တစ်သိန်းစီပေးအပ်ခဲ့ကြောင်းနှင့်၎င်းတို့သွားလိုရာနေရာများအသီးသီးသို့လည်းလုံခြုံစွာပို့ပေးထားခဲ့ပြီးဖြစ်ကြောင်းလည်းညီနောင်မဟာမိတ် (၃) ဖွဲ့ operation 1027မှ ထုတ်ပြန်ထားသည်။

ကျိုက်မရောတွင် အကြမ်းဖက်စစ်ကောင်စီတပ်မှ ၂၆ ဦး လက်နက်ချ အညံ့ခံလာ (ရုပ်သံ)

7 months ago

“လက်နက်ချလာတာ၂၆ ယောက်၊ ဒုရင်းမှူး အပါအဝင် အသေတွေများတယ်။ အရှင်မိတာတွေလည်း ရှိတယ်”
မြေပြင် စစ်သတင်းအရင်းအမြစ်
=========
နိုဝင်ဘာ ၁၄
မွန်ပြည်နယ်၊ ကျိုက်မရောမြို့နယ်၊ ချောင်းနှစ်ခွ တိုက်ပွဲတွင် အကြမ်းဖက်စစ်ကောင်စီတပ်ဖွဲ့ဝင် ၂၆ ဦး တော်လှန်ရေးတပ်ဖွဲ့များထံ လက်နက်ချ အညံ့ခံလာကြောင်း မြေပြင်စစ်သတင်းအရင်းအမြစ်ထံမှ သိရသည်။
“လက်နက်ချလာတာ၂၆ ယောက်၊ ဒုရင်းမှူး အပါအဝင် အသေတွေများတယ်။ အရှင်မိတာတွေလည်း ရှိတယ်။ တိုက်ပွဲက မပြီးသေးဘူး။ အခု စစ်ကူလာတဲ့ အဖွဲ့တွေ တိုက်နေတယ်”ဟု မြေပြင်စစ်သတင်းအရင်းအမြစ်က Spring of Burma Media သို့ ပြောသည်။
အဆိုပါ လက်နက်ချလာသော တပ်မှာ ချောင်းနှစ်ခွသို့စစ်ကြောင်းထိုးလာသော တပ်မ ၂၂ စစ်ကြောင်းမှ ဖြစ်ကာ
ယင်းစစ်ကြောင်းမှာ အင်အား ၅၀ ခန့်ရှိသော စစ်ကြောင်းဖြစ်ကြောင်းနှင့် အမျိုးသားညီညွတ်ရေးအစိုးရ ကာကွယ်ရေး ဝန်ကြီးဌာမှလည်း ၂၃ ဦး လက်နက်ချ အညံ့ခံလာသည်ဟု ထုတ်ပြန်ထားကာ ယင်းတိုက်ပွဲတွင် တပ်ရင်းမှူးနှင့် အရာရှိတစ်ဦး အပါအဝင် ၁၄ ဦး သေဆုံးပြီး၊ အရာရှိတစ်ဦး အပါအဝင် ၅ ဦး အရှင်ဖမ်းမိကြောင်း၊ နောက်ထပ် အရာရှိ တစ်ဦးအပါအဝင် ၈ ဦး ပျောက်ဆုံးနေဆဲဖြစ်ကြောင်းလည်း အသိပေး ထုတ်ပြန်ထားကြောင်း သိရသည်။
“ဒီကောင်တွေ စိတ်ဓာတ်က ပျက်နေတာ။ အရှေ့မှာလည်း အကျများထားတာ ရှိတာကိုး။ အဲဒီဘက်မှာ ဒီရက်က တိုက်ပွဲကလည်း တအားပြင်းထန်နေတာ” ဟု တော်လှန်ရေး တပ်ဖွဲ့ဝင်တစ်ဦးက ဆိုသည်။
မွန်ပြည်နယ်၊ ကျိုက်မရောမြို့နယ် ချောင်းနှစ်ခွတွင် တိုက်ပွဲများပြင်းထန်နေကာ ချောင်းနှစ်ခွ နယ်မြေရဲစခန်းနှင့် အတ္ထံရံတံတား စစ်ဆေးရေးဂိတ်ကိုလည်း နိုဝင်ဘာ ၁၃ ရက်တွင် တော်လှန်ရေးတပ်ဖွဲ့များက သိမ်းပိုက်ထားခဲ့ကြောင်း၊ ယင်းတိုက်ပွဲများအား ဂဠုန်တပ်ဖွဲ့ နှင့် တော်လှန်ရေးအင်အားစုများ၊ ဒေသခံတပ်ဖွဲ့များက တိုက်ခိုက်နေခြင်းဖြစ်ကြောင်းလည်း သိရသည်။

ကွမ်းလုံအသိမ်းခံရပြီးနောက် ပါစင်ကျော်ကို တော်လှန်ရေးတပ်ဖွဲ့များ ထပ်မံသိမ်းပိုက်

7 months ago

ကွမ်းလုံတွင် MNDAA နှင့်အဖွဲ့ ခိုးကြောင် ခိုးဝှက်ဓာတ်ပုံဝင်လာရိုက်ခြင်းဖြစ်သည်ဟု အကြမ်းဖက်စကစဘက်မှ ပြောကြားချိန်တွင် ကွမ်းလုံနှင့် ပါစင်ကျော် သိမ်းပိုက်ထားသော မှတ်တမ်းရုပ်သံများ ထွက်ပေါ်လာ
===========
နိုဝင်ဘာ ၁၃
ရှမ်းပြည်နယ်မြောက်ပိုင်း အထူးဒေသ ၁ ၏ ထိန်းချုပ်နယ်မြေဖြစ်ခဲ့သော ကွမ်းလုံမြို့နှင့်အတူ ကိုးကန့်ခရိုင်၊ တုန်းရှမ်းဒေသ၏ အုပ်ချုပ်ရေးရုံးရှိရာ ရှီးယွင်ကြည်ရွာ (ပါစင်ကျော်)ကို MNDAAနှင့် မဟာမိတ်အဖွဲ့များကနိုဝင်ဘာ ၁၃ ရက်တွင် တိုက်ခိုက်သိမ်းပိုက်နိုင်ခဲ့ကြောင်း သိရသည်။
အဆိုပါ ရှီးယွင်ကြည်ရွာ(ပါစင်ကျော်)မှာ အကြမ်းဖက်စစ်ကောင်စီ၏ အရေးပါသော အုပ်ချုပ်နယ်မြေတစ်ခုဖြစ်ကာ ကွမ်းလုံ အသိမ်းခံရပြီးနောက် ဆက်တိုက်ဆိုသလို ထပ်မံအသိမ်းခံခဲ့ရခြင်းဖြစ်ကြောင်း သိရသည်။
ယင်းသို့တိုက်ခိုက်သိမ်းပိုက်မှုများနှင့် ပတ်သက်၍ အကြမ်းဖက်စစ်ကောင်စီ တာဝန်ရှိသူက ၄င်းတို့၏ ဝါဒဖြန့် မီဒီယာတွင် ပြောကြားရာ၌ ကွမ်းလုံတွင် စစ်ဗျူဟာအရ ဟ ပေးထားသော နေရာများရှိကြောင်း၊ ယင်းနေရာများကို MNDAAအဖွဲ့က ခိုးကြောင်ခိုးဝှက်ဖြင့် ဝင်ရောက်လာပြီး ဓာတ်ပုံရိုက်သွားသည့် ပုံစံမျိုးရှိကြောင်း ပြောခဲ့ပြီး ၁၂ ရက် ညအထိ ရှမ်းမြောက် ကိုးကန့်ဒေသတွင် တိုက်ပွဲများဖြစ်နေဆဲဖြစ်ကြောင်းနှင့် နယ်ခြား မှတ်တိုင် ၁၂၅ နားတွင် ရှိသော စစ်ဘေးရှောင်များကိုလည်း MNDAAအဖွဲ့ကနှစ်နိုင်ငံ အထင်အမြင်လွဲစေရန်အတွက် လက်နက်ကြီးဖြင့်ပစ်ခဲ့ကြောင်း စသဖြင့် ပြောခဲ့သလို ယင်းနောက်မှာပင် ကွမ်းလုံမြို့သိမ်းအောင်ပွဲခံရုပ်သံများနှင့် ရှီးယွင်ကြည်ရွာ(ပါစင်ကျော်) အသိမ်းခံရသည့် ရုပ်သံများကို တော်လှန်ရေးတပ်ဖွဲ့များမှ ထုတ်ဖော်လာခဲ့ခြင်းဖြစ်သည်။
(၁၀၂၇)စစ်ဆင်ရေး Operation ၏ ဆက်တိုက်လုပ်ဆောင်မှုများအဖြစ် ညီနောင်မဟာမိတ်တပ်ဖွဲ့မှ စစ်ကောင်စီ၏ ရှီးရှမ်းဒေသ၊ ရှောက်ကိုင်ရွာအုပ်စုရှိ စစ်ဆေးရေးဂိတ်တစ်ခုကို နိုဝင်ဘာ ၁၃ ရက်တွင် သိမ်းယူထားကြောင်းနှင့် ၁၀၂၇ စစ်ဆင်ရေး ၁၈ ရက်အတွင်း နိုဝင်ဘာ ၁၃ ရက်အထိ ညီ‌နောင်မဟာမိတ်တပ်ဖွဲ့တို့မှ စစ်ကောင်စီ၏ တပ်စခန်းအကြီး၊ အသေး စုစုပေါင်း ၁၄၁ ခု သိမ်းပိုက်နိုင်ခဲ့ကြောင်းလည်း The KoKang တွင် ဖော်ပြချက်အရ သိရသည်။