အကြမ်းဖက်စစ်ကောင်စီက အရပ်သုံးကားများအား ဖမ်းဆီးအသုံးပြုနေခြင်းကြောင့် အမှတ်(၈) ပြည်ထောင်စုလမ်းမ လမ်းပိုင်းတစ်ခုအား ကန့်သတ်အသုံးပြုရန် တော်လှန်ရေးအဖွဲ့များ ထုတ်ပြန်

2 months ago

ဧပြီ ၁
အကြမ်းဖက်စစ်ကောင်စီက အရပ်သုံးကားများ အသုံးပြု၍ သွားလာခြင်း၊ အရပ်သားပြည်သူအသွင်ဖြင့် စစ်အင်အားဖြည့်တင်းခြင်းများကို ပြုလုပ်နေခြင်းကြောင့် အမှတ်(၈) ပြည်ထောင်စုလမ်းမ (ရေးမြို့တောင်ပိုင်းမှ ထားဝယ်ခရိုင် သရက်ချောင်းမြို့နယ်အထိ)အား နံနက် ၆ နာရီမှ ညနေ ၆ နာရီအထိသာ သွားလာခွင့်ပြုမည်ဖြစ်ကြောင်း ဒေါနစစ်ကြောင်းက သတင်းထုတ်ပြန်လိုက်သည်။
May be an image of 8 people and text that says "ABSOF"
“ဒီထုတ်ပြန်ချက်နဲ့ ပတ်သက်ပြီး ပြည်သူတွေ ဂရုစိုက်သွားလာဖို့ ပစ်ခတ်မှုဖြစ်ရင် ယာဥ်ရပ်ထားပေးဖို့ ဖြည့်စွက်ပြောလိုပါတယ်။ စစ်ကောင်စီက ညဘက်မှာ အရပ်ဖက်သုံးကားတွေ သုံးလာတယ်။ ဒါကြောင့် စာထုတ်ရတာပေါ့” ဟု ဒေါနစစ်ကြောင်း၊ ဗျူဟာ (၃၃)၏ စစ်ဆင်ရေးမှူး စောဒါးကိုက ဆိုသည်။
အမှတ်(၃)စစ်ဒေသခွဲအနေဖြင့် အာဏာသိမ်းအကြမ်းဖက်စစ်ကောင်စီအား တန်ပြန်ထိုးစစ်ဆင်ကာ စစ်ရေးအရှိန်အဟုန်မြှင့်တင်ဆောင်ရွက်မည်ဖြစ်ပြီး စစ်ကောင်စီ၏ အဆိုပါလုပ်ရပ်များကြောင့် ပြည်သူများ ထိခိုက်နစ်နာမှုမရှိစေရန်အတွက် ယင်းသို့ ထုတ်ပြန်ရခြင်းဖြစ်သည်ဟု သိရသည်။
“ကျွန်တော်တို့ သတင်းရတာကတော့ စစ်ကောင်စီက အရပ်သားပြည်သူတွေရဲ့ ကားကို ထိန်းပြီး သူတို့လိုအပ်တဲ့အခါ သွားနိုင်အောင် ဖမ်းထားတာ ထိန်းထားတာတွေ ရှိနေပါတယ်။ စစ်ကောင်စီဘက်က ပြည်သူတွေကို လူသားဒိုင်းအနေနဲ့ သုံးနေတာရှိတဲ့အတွက် ပြည်သူတွေအနေနဲ့ အရေးကြီးကိစ္စမရှိရင် မသွားကြဖို့၊ တကယ်လို့ သွားရမယ့်ကိစ္စ ရှိတယ်ဆိုလည်း ကားမှန်ချပြီး သွားကြဖို့၊ ကျွန်တော်တို့ရဲ့ စစ်ဆေးမှုတွေကိုလည်း ကြည်ဖြူစွာလက်ခံပေးဖို့ မေတ္တာရပ်ခံချင်ပါတယ်” ဟု ဒေါနစစ်ကြောင်း၏ စစ်ကြောင်းတာဝန်ခံ ကိုရန်နိုင်ကလည်း ပြောသည်။
May be an image of 5 people and text
သတ်မှတ်လမ်းပိုင်းအတွင်း နေ့အချိန် ခရီးသွားလာရာတွင် မော်တော်ယာဥ်များ မှန်ချမောင်း၍ တာဝန်အရ စစ်ဆေးမှုကို ကြည်ဖြူစွာ လက်ခံရမည်ဖြစ်ပြီး အထက်ပါထုတ်ပြန်ချက်အား လိုက်နာရန် ပျက်ကွက်ပါက ဖြစ်လာမည့်အကျိုးဆက်များအား ဒေါနစစ်ကြောင်းနှင့် မဟာမိတ်တပ်ပေါင်းစုများမှ လုံးဝတာဝန်ယူမည် မဟုတ်ကြောင်းလည်း အသိပေးထုတ်ပြန်ချက်တွင် ဖော်ပြထားသည်။
ပုံစာ – အမှတ်(၈)ပြည်ထောင်စုလမ်းမတွင် တော်လှန်ရေးအဖွဲ့များက မတ် ၁၉ ရက်နေ့၌ နယ်မြေစိုးမိုးမှု ဆောင်ရွက်ခဲ့စဉ်။

ဖာပွန် အခြေစိုက် ခလရ ၁၉ တပ်ရင်း သိမ်းပိုက်ခံရပြီးနောက် စစ်ကောင်စီတပ်က ပြည်သူကို ပစ်မှတ်ထားကာ လေကြောင်းမှ ဗုံးကြဲတိုက်ခိုက်၊ ၈ ဦး သေဆုံးပြီး ၁၀ ဦးခန့် ဒဏ်ရာရရှိ

2 months ago

ဧပြီ ၁
ဖာပွန် အခြေစိုက် ခလရ ၁၉ တပ်ရင်းကို KNLA ပူးပေါင်းတပ်ဖွဲ့က သိမ်းပိုက်ပြီးနောက် စစ်ကောင်စီတပ်က လေကြောင်းဖြင့် ဗုံးများကြဲချခဲ့ရာ ပြည်သူ ၈ ဦးခန့် သေဆုံးခဲ့ရကြောင်း မြေပြင်တော်လှန်ရေး အရာရှိတစ်ဦးထံမှ သိရသည်။
No photo description available.
ခလရ ၁၉ တပ်ရင်းကို မတ် ၃၀ ရက်နေ့က သိမ်းပိုက်ခဲ့ပြီးနောက် စစ်ကောင်စီတပ်က လေကြောင်းဖြင့် ဗုံးများ ဆက်တိုက်ကြဲချခဲ့ကြောင်း၊ မတ် ၃၁ ရက် နေ့လယ် ၁ နာရီခန့်က ဖာပွန်မြို့ မြို့မရွှေကျောင်း ဘုန်းကြီးကျောင်းသို့ ဗုံးကြဲချ တိုက်ခိုက်မှုကြောင့် စစ်ရှောင်ပြည်သူ ၈ ဦးခန့် သေဆုံးကာ ၁၀ ဦးခန့် ဒဏ်ရာရရှိကြောင်း သိရသည်။
“ခလရ ၁၉ ကို ပြန်ယူဖို့ ကြိုးစားတဲ့အပိုင်းလည်း ရှိတယ်။ လေ‌ယာဉ်နဲ့ ဗုံးကြဲတဲ့အခါမှာ ဖာပွန်မှာ ဘာမှမရှိတော့ဘူး။ လူထုပဲ ရှိတယ်။ ဒါကတော့ တမင်သက်သက် လူထုကို ပစ်မှတ်ထား လုပ်တဲ့ပုံစံမျိုးပဲ။ တနည်းအားဖြင့် တော်လှန်ရေး ဘက်တော်သားတွေ‌နဲ့ ပြည်သူအကြား ရန်တိုက်ပေးသလိုပေါ့။ ခင်ဗျားတို့ စစ်ဆင်ရေးလုပ်လို့ လူထုတွေ ဒီလိုဖြစ်ရတယ်ဆိုတာမျိုးဖြစ်အောင် လူထုကို သဲကြီးမဲကြီး လိုက်ဒုက္ခပေးနေတဲ့ ပုံစံမျိုးလို့ သုံးသပ်မိတယ်” ဟု အဆိုပါ တော်လှန်ရေးအရာရှိက ဆိုသည်။
May be an image of 4 people, slow loris and text that says "and got bombed"
လက်ရှိတွင်လည်း စစ်ကောင်စီက လေကြောင်းဖြင့် ဆက်လက်ဗုံးကြဲတိုက်ခိုက်နေခြင်းကြောင့် ကျန်ရှိသည့် ပြည်သူများက နီးစပ်ရာနေရာများသို့ ရွှေ့ပြောင်းနေထိုင်ကြပြီဖြစ်ကြောင်း သိရသည်။
စစ်ကောင်စီတပ်၏ လေကြောင်းတိုက်ခိုက်မှုကြောင့် ထိခိုက်ဒဏ်ရာရရှိခဲ့သူများအား Free Burma Rangers အဖွဲ့ကလည်း သွားရောက်ကူညီ ဆေးကုသပေးမှုများ ပြုလုပ်ခဲ့သည်။
KNLA ပူးပေါင်းတပ်က စစ်ကောင်စီ တပ်ရင်း ၂ ခုဖြစ်သည့် (စစန) ၆၄၂ နှင့် ခလရ ၁၉ ကို သိမ်းပိုက်ရာတွင် လက်နက်တိုက် ၇ လုံးပါ ပါဝင်သောကြောင့် လက်နက်မြောက်မြားစွာလည်း သိမ်းဆည်းရမိခဲ့ကြောင်း၊ ကျန်ရှိ‌သော တပ်ရင်း ၄ ခု ထပ်မံ မကျဆုံး‌စေရန် စစ်ကောင်စီတပ်များက လေယာဥ်၊ ဒရုန်း၊ လက်နက်ကြီးများဖြင့် ခုခံနေခြင်းဖြစ်ကြောင်း မြေပြင်ရဲဘော်တစ်ဦးကလည်း ဆိုထားသည်။
Shwe/SOB
May be an image of 3 people, clothes iron and hospital

စစ်ကောင်စီ၏ သတင်းမှားများအား ယုံကြည်ပြီး ဆီဆိုင်မြို့တွင်း မဝင်ကြရန် PNLA သတိပေး

2 months ago

မတ် ၃၁
အကြမ်းဖက်စစ်ကောင်စီသည် ပြည်သူအား လူသားဒိုင်းအဖြစ်အသုံးပြုရန် ရည်ရွယ်ချက်ဖြင့် လူထုများအား ဆီဆိုင်မြို့တွင်း ပြန်ဝင်နိုင်ပြီဖြစ်ကြောင်း သတင်းအမှားများ ဖြန့်နေခြင်းအား သတိပြုကြရန် ပအိုဝ်းအမျိုးသားလွတ်မြောက်ရေးတပ်မတော် PNLA က သတိပေးထားသည်။
No photo description available.
လက်ရှိဆီဆိုင်မြို့တွင်းသည် တိုက်ပွဲဖြစ်ပွားနေသည့် အခြေအနေ ဖြစ်ပြီး စစ်ကောင်စီသည် မြို့တွင်းသို့ စစ်ကြောင်းထိုးလာသဖြင့် မြို့သည် စစ်ဇုန်ဖြစ်ကြောင်း၊ စစ်ကောင်စီသည် လူထုတချို့ကို ပအိုဝ်း၀တ်စုံ ၀တ်ဆင်စေပြီး လူသားဒိုင်းလုပ်ကာ ဆီဆိုင်မြို့တွင်းနေရာအချို့တွင် ဓာတ်ပုံ၀င်ရိုက်ကြသည်ကို တွေ့မြင်ရကြောင်း၊ စစ်ကောင်စီက လူထုကို လူသားဒိုင်းလုပ်ထားသဖြင့် တော်လှန်ရေးအင်အားစုက တိုက်ခိုက်မှုမပြုလုပ်ကြခြင်းဖြစ်ကြောင်း သိရသည်။
လက်ရှိတွင် စစ်ကောင်စီသည် အင်အားဖြည့်တင်းကာ ဆီဆိုင်မြို့ကို ပစ်ခတ်ဖျက်ဆီးနေလျက်ရှိသဖြင့် တိုက်ပွဲလည်းဖြစ်ပွားနေဆဲဖြစ်သည်ဟု သိရသည်။
No photo description available.
သတင်းအမှားများကို ယုံကြည်ပြီး စစ်မက်ဖြစ်ပွားနေသည့် စစ်ဇုန်အတွင်းသို့ ဝင်ရောက်မိပါက စစ်ကောင်စီ၏ လူသားဒိုင်းအဖြစ် အသုံးပြုခြင်းကို ခံရနိုင်ပြီး မလိုလားအပ်သည့် ထိခိုက်မှုများလည်းဖြစ်ပွားနိုင်ကြောင်း၊ ပြည်သူများအနေဖြင့် စစ်ကောင်စီမှ လူသားဒိုင်းအဖြစ် အသုံးပြုခြင်းမခံရစေရန်နှင့် တိုက်ပွဲအကြား မလိုလားအပ်သည့် ထိခိုက်မှုများ မဖြစ်စေရန်အတွက် ပအိုဝ်းအမျိုးသားလွတ်မြောက်ရေးတပ်မတော်၏ တရားဝင်ထုတ်ပြန်ချက်များကို စောင့်ကြည့်ကြရန် အထူးတိုက်တွန်းအပ်ကြောင်းလည်း ဆိုထားသည်။

လွိုင်ကော်မြို့နယ် ဒေသခံပြည်သူကာကွယ်ရေးတပ်၊ တပ်ရင်း ၃ မှ သင်တန်းသားသစ်များ ခေါ်ယူမည်

2 months ago

မတ် ၃၁
လွိုင်ကော်မြို့နယ် ဒေသခံပြည်သူကာကွယ်ရေးတပ်၊ တပ်ရင်း ၃ (Loikaw Local PDF Alpha 3) မှ သင်တန်းသားသစ်များ ခေါ်ယူသွားမည်ဖြစ်ကြောင်း အဆိုပါတပ်ရင်းမှ တာဝန်ရှိသူ ကိုညီညီက ပြောသည်။
သင်တန်းသားသစ်များကို ဧပြီ ၁ ရက်နေ့တွင် စတင်ခေါ်ယူမည်ဖြစ်ပြီး Loikaw Local PDF Alpha 3 အပတ်စဉ် (၃) အတွက် ခေါ်ယူခြင်းဖြစ်ကြောင်းနှင့် သင်တန်းသားဦးရေ မကန့်သတ်ထားကြောင်း သိရသည်။
“အဓိက လွိုင်ကော် နယ်ခံတွေကို ဦးစားပေးခေါ်မှာပါ။ တခြားမြို့တွေက တော်လှန်ရေး စိတ်အားထက်သန်သူတွေလည်း ခေါ်ပါမယ်ဗျ။ သင်တန်းသားသစ်တွေအနေနဲ့ အတတ်နိုင်ဆုံး အင်အား အပြည့်အဝ ပါစေချင်တယ်။ တော်လှန်ရေးမှာလည်း လူငယ်တိုင်း၊ လူကြီးတိုင်း ကျရာကဏ္ဍမှာ ပါစေချင်တယ်။ အဓိက ကိုယ့်မြို့ကိုယ် ကာကွယ်တဲ့နေရာမှာ ပါစေချင်တယ်” ဟု ၎င်းက ဆက်လက်ပြောသည်။
စစ်မှုထမ်းဥပဒေ ထုတ်ပြန်ပြီးနောက်တွင်လည်း တပ်ရင်းထံ ဆက်သွယ်ဝင်ရောက်လာသည့် လူငယ် ၁၅ ဦးခန့် ရှိကြောင်းလည်း သိရသည်။
လွိုင်ကော်မြို့နယ် ဒေသခံပြည်သူကာကွယ်ရေးတပ်၊ တပ်ရင်း ၃ တွင် တာဝန်ထမ်းဆောင်ကြမည့် သင်တန်းသားများအနေဖြင့် ကျန်းမာရေးကောင်းမွန်ပြီး ပင်ပန်ဆင်းရဲဒဏ်ခံနိုင်ရမည်ဖြစ်ကြောင်း၊ အကျင့်စာရိတ္တကောင်းမွန်ပြီး အနည်းဆုံး ၂ နှစ် စစ်မှုထမ်းနိုင်ရမည်ဖြစ်ကြောင်း၊ အသက် ၁၈ နှစ်မှ ၄၀ နှစ်အတွင်းဖြစ်ရမည်ဖြစ်ပြီး အကြမ်းဖက်စစ်ကောင်စီအား လက်နက်ကိုင်တော်လှန်ရန်နှင့် အာဏာရှင်စနစ်ကို အဆုံးတိုင် တိုက်ဖျက်ရန် စိတ်အားထက်သန်သူဖြစ်ရမည်ဖြစ်ကြောင်း စသည့် စည်းမျဉ်းများနှင့် ကိုက်ညီရမည်ဖြစ်ကြောင်း သိရသည်။

ဖာပွန်မြို့ပေါ်ကို KNLA ပူးပေါင်းတပ်က အလုံးစုံထိန်းချုပ်ထားပြီး ကျန်မြို့ပြင်တပ်ရင်းများ သိမ်းပိုက်နိုင်ရေး ဆက်လက်ကြိုးပမ်းနေ တိုက်ပွဲများ ဆက်လက်ဖြစ်ပွားနေကာ စစ်ကောင်စီတပ်မှ Y 12 လေယာဉ်ဖြင့် ဆက်တိုက် ဗုံးကြဲလျက်ရှိ

2 months ago

မတ် ၃၁
ကရင်ပြည်နယ်၊ KNU တပ်မဟာ ၅ နယ်မြေ၊ ဖာပွန်မြို့နယ်ရှိ ခလရ ၁၉ တပ် ရင်းနှင့် စစ်လက်နက်ပစ္စည်းတပ်ရင်း(စစန) ၆၄၂ တို့ကို KNLA နှင့် PDF ပူး ပေါင်းတပ်များက တိုက်ခိုက် သိမ်းပိုက်ရရှိထားပြီး ဖာပွန်မြို့ပေါ်ကို အလုံးစုံသိမ်းပိုက်ထားနိုင်ပြီဖြစ်ကာ မြို့ပြင်ရှိ ကျန်တပ်ရင်း ၃ ခုကို ဆက်လက်သိမ်းနိုင်ရေး ကြိုးပမ်းနေကြောင်း တပ်မဟာ ၅ မှ တော်လှန်ရေးသတင်းအရင်းမြစ်က ပြောသည်။
လက်ရှိတွင် ဖာပွန်မြို့ပေါ်၌ စစ်ကောင်စီတပ်၏ အငွေ့အသက် လုံးဝမရှိတော့ဘဲ မြို့ပေါ်သည် တပ်မဟာ ၅ လက်အောက် ပြန်လည်ကျရောက်သွားပြီဖြစ်ကြောင်း၊ လက်ရှိမှာလည်း တိုက်ပွဲများ ဆက်လက်ဖြစ်ပွားနေကာ စစ်ကောင်စီတပ်မှ Y 12 လေယာဉ်ဖြင့် ဗုံးကြဲခြင်းများ ဆက်တိုက်ပြုလုပ်နေကြောင်းလည်း သိရသည်။
May be an image of text that says "SBK"
“မနေ့မနက်ကနေ ညအထိ လေယာဉ်နဲ့ ဗုံးကြဲတာ။ ဒီနေ့မှာလည်း ဗုံးသီးတွေ ပစ်ချတာ တရစပ်ပဲ။ တိုက်ပွဲကလည်း ဆက်တိုက်ဖြစ်နေတာ။ Y 12 ဆိုတာက ဗုံးသီးတွေချိတ်ပြီး ပစ်တဲ့ လေယာဉ်မျိုး မဟုတ်ဘူး။ လူက ပစ်ချတာ” ဟု ယင်းက ပြောသည်။
ဖာပွန်မြို့တည်ရာနေရာနှင့် လက်ရှိ ဖာပွန်ဗျူဟာကုန်းတည်ရာနေရာမှာ တစ်မိုင်ကျော်ခန့်သာ ဝေးပြီး မြို့ပေါ်ရှိ စကစ စခန်းများ၊ ကာကင်းများ၊ မော်တာကုန်းများ စသည်တို့ကို မဟာမိတ်ပူးပေါင်းတပ်များမှ သိမ်းပိုက်ရရှိပြီး ဖြစ်သည်။
“မြို့ထဲမှာကျတော့ အစက သူတို့ရဲ့ စခန်းတွေ၊ ကာကင်းတွေ စသဖြင့် ထားထားတာရှိတယ်။ မော်တာကုန်းတို့ ဘာတို့။ အဲဒါကို မဟာမိတ်ပူးပေါင်းတပ်တွေက အကုန်လုံး သိမ်းပိုက်ပြီးသွားပြီ။ မြို့ပေါ်မှာကျတော့ စကစနဲ့ သက်ဆိုင်တဲ့ အငွေ့အသက် တစ်ခုမှ ရှိမတော့သလို စကစလည်း မရှိတော့ဘူး။ မြို့က လုံးဝ တပ်မဟာ ၅ လက်အောက် ပြန်ရောက်သွားပြီ” ဟု အဆိုပါ တော်လှန်ရေး သတင်းအရင်းမြစ်က ပြောသည်။
May be an image of 1 person
ဖာပွန်မြို့ပေါ်ရှိ စကစများက မြို့ပြင်တပ်ရင်းများသို့ ထွက်ပြေးသွားခဲ့ကြပြီဖြစ်ပြီး မြို့ပြင်ရှိ တပ်ရင်းများကို ဆက်လက်သိမ်းနိုင်ရန် ကြိုးပမ်းနေကြောင်း သိရသည်။
“မြို့အပြင် တစ်မိုင်အကွာ ဗျူဟာကုန်းမှာကျတော့ တပ်ရင်း ၄ ရင်း ရှိတယ်။ အဲဒီထဲကမှ ခလရ ၁၉ ရှေ့တန်းဌာနချုပ်ပေါ့။ အဲဒီ ခလရ ၁၉ က ပထမဦးဆုံးစပြီး စခန်းတည်တာပေါ့နော်။ နောက်ပိုင်းကျတော့ ဗျူဟာတည်တဲ့အခါမှာ ခမရ ၃၄၀၊ ခမရ ၃၄၁၊ ခမရ ၄၃၄ ပေါ့နော်။ အဲဒီတပ်ရင်းတွေပါ ပါလာတယ်။ ဗျူဟာက အခြေကျဗျူဟာဖြစ်တြဲအတွက် တပ်ရင်း ‌၄ ရင်းနဲ့ ဗျူဟာတစ်ခုပေါ့နော်။ ခလရ ၁၉ ကတော့ သိမ်းပိုက်ပြီးသွားပြီပေါ့။ ပစ္စည်းတွေ ဘာတွေ အကုန်လုံးလည်း ရသွားပြီ။ ပြီးတော့ (စစန) ၆၄၂ ကိုလည်း ရသွားပြီပေါ့နော်။ အခုတော့ ခမရ ၃၄၀၊ ပြီးရင်း ဗျူဟာကုန်း၊ ခမရ ၃၄၁၊ ခမရ ၄၃၄၊ ခုတင် ၁၀၀ ဆေးရုံကလည်း တပ်ရင်းပဲ။ အဲဒါတွေ သိမ်းပိုက်ဖို့ ကျန်သေးတယ်ပေါ့နော်။ တော်လှန်ရေးမဟာမိတ်တွေက ဆက်ပြီးတော့ အလုံးစုံရရှိရေး ကြိုးပမ်းနေတယ်။ လုပ်နိုင်ကြမယ်လည်း ယုံကြည်မှု ရှိတယ်။ အားလုံးက အကောင်းဆုံးကြိုးစားသွားမှာပါ” ဟု ၎င်းက ဆက်လက်ပြောသည်။
ပြီးခဲ့သည့် မတ် ၁၉ ရက်နေ့မှ စတင်ကာ အကြမ်းဖက်စစ်တပ်၏ စဗခ(၁)ရတခ လက်အောက်ခံ တပ်ရင်းစခန်းများ တည်ရှိသည့် မယ်တရိုး၊ ဝေနောင်၊ တံခွန်တိုင်နှင့် ဝေဆာ၏ ကူးလူးဆက်သွယ်ရေး လမ်းများအားလုံးကို ပိတ်ဆို့ ဖြတ်တောက်လိုက်ခြင်းဖြစ်ပြီး ကရင်အမျိုးသားလွတ်မြောက်ရေးတပ်မတော်နှင့် တော်လှန်ရေးပူးပေါင်းတပ်ဖွဲ့များ ပူးပေါင်းလုပ်ဆောင်ခဲ့ခြင်းဖြစ်ကြောင်း၊ မတ် ၃၀ ရက်နေ့တွင် ခလရ ၁၉ ကို သိမ်းပိုက်နိုင်ခဲ့ပြီး ဖာပွန်မြို့ကို KNLA ၊ PDF အပါအဝင် တော်လှန်ရေး မဟာမိတ်တပ်များက သိမ်းပိုက်ထိန်းချုပ်ခဲ့ခြင်းဖြစ်ကြောင်း သိရသည်။
Shwe
Photo – KNLA ရဲဘော်အချို့၏ လူမှုကွန်ရက်။

အကြမ်းဖက်စစ်အုပ်စု၏ အဓမ္မ စစ်သားစုဆောင်းမှုလုပ်ရပ်နှင့်ပတ်သက်၍ တိုင်ကြား၊ စုံစမ်း၊ အကြံဉာဏ် ရယူနိုင်သည့် ပြည်သူ့ရေးရာဝန်ဆောင်မှု NUG စတင်

2 months ago

မတ် ၃၀
အကြမ်းဖက်စစ်အုပ်စု၏ အဓမ္မ စစ်သားစုဆောင်းမှုလုပ်ရပ်နှင့်ပတ်သက်၍ တိုင်ကြား၊ စုံစမ်း၊ အကြံဉာဏ်ရယူနိုင်သည့် ပြည်သူ့ရေးရာဝန်ဆောင်မှုစတင်လိုက်ကြောင်း အမျိုးသားညီညွတ်ရေးအစိုးရ NUG က သတင်းထုတ်ပြန်သည်။
အကြမ်းဖက်စစ်အုပ်စု၏ အဓမ္မ စစ်သားစုဆောင်းမှုလုပ်ရပ်ကြောင့် ထိခိုက်ခံစားကြရသော ပြည်သူလူထု၏ စိတ်သောကများအား သက်သာရာရစေရန်နှင့် လိုအပ်သော အကူအညီနှင့် အထောက်အပံ့များကို တတ်နိုင်သမျှ ချိတ်ဆက်ပံ့ပိုးပေးနိုင်ရန်ရည်ရွယ်၍ အမျိုးသားညီညွတ်ရေးအစိုးရအနေဖြင့် ပြည်သူ့ရေးရာဝန်ဆောင်မှု တစ်ခုအဖြစ် Telegram Channel – https://t.me/nugpublicaffairsbot ကို ယနေ့ မတ် ၃၀ ရက်နေ့တွင် စတင်ဖွင့်လှစ်လိုက်ကြောင်း ကြေညာသည်။
လတ်တလောတွင် အမျိုးသားညီညွတ်ရေးအစိုးရ၏ ပြည်သူ့ရေးရာဝန်ဆောင်မှုကို အဓမ္မစစ်သားစုဆောင်းမှုနှင့် သက်ဆိုင်သော ကိစ္စရပ်များနှင့် ပတ်သက်ပြီး နေ့စဉ် နံနက် ၁၀ နာရီမှ ည ၁၀ နာရီအထိ ဝန်ဆောင်မှုပေးသွားမည်ဖြစ်ကြောင်း သိရသည်။
အကြမ်းဖက်စစ်အုပ်စုက လုပ်ဆောင်နေသော အတင်းအဓမ္မ စစ်သားစုဆောင်းမှု၏ ဆိုးကျိုးသက်ရောက်မှုကို ခံစားနေကြရသည့် ပြည်သူလူထုတရပ်လုံးအနေဖြင့် အဆိုပါ Channel မှတဆင့် သိရှိလိုသည်များကို မေးမြန်းခြင်း၊ အကြံဉာဏ်များတောင်းခံခြင်း၊ အကူအညီများတောင်းခံခြင်း၊ တိုင်ကြားခြင်း၊ သတင်းပေးခြင်းတို့ကို ပြုလုပ်နိုင်ပြီး Channel တာဝန်ခံအဖွဲ့အနေဖြင့် အမျိုးသားညီညွတ်ရေးအစိုးရ၏ သက်ဆိုင်ရာ ဝန်ကြီးဌာနများ၊ ရုံးဌာနများနှင့် ချိတ်ဆက်ကာ မေးခွန်းများပြန်လည်ဖြေကြားခြင်း၊ အကြံဉာဏ်များပေးခြင်း၊ သက်ဆိုင်ရာဌာနများသို့ လမ်းညွှန်ပေးခြင်း၊ အကူအညီပေးအပ်နိုင်မည့် အဖွဲ့အစည်းများနှင့် ချိတ်ဆက်ပေးခြင်း၊ တိုင်ကြားမှု သတင်းပေးမှုများကို မှတ်တမ်းတင်၍ သက်ဆိုင်ရာ အဖွဲ့အစည်းများသို့ ပေးပို့ခြင်းတို့ကို ဆောင်ရွက်သွားမည်ဖြစ်သည်ဟု ဆိုသည်။
ယင်းကြောင့် မြန်မာနိုင်ငံသူ နိုင်ငံသား တိုင်းရင်းသားပြည်သူလူထုများအနေဖြင့် အဓမ္မ စစ်သားစုဆောင်းခြင်းဖြင့် မိမိတို့အား ထပ်မံဖိစီးနှိပ်စက်နေသည့် အကြမ်းဖက်စစ်အုပ်စုအား သက်ဆိုးရှည်စေရန် ၎င်းတို့၏ လုပ်ကိုင်ဆောင်ရွက်မှု မှန်သမျှတွင် ပူးပေါင်းဆောင်ရွက်ခြင်းမပြုဘဲ အမျိုးသားညီညွတ်ရေးအစိုးရအပါအဝင် တိုင်းရင်းသားတော်လှန်ရေးအင်အားစုများနှင့် ချိတ်ဆက်ကာ နည်းလမ်းပေါင်းစုံဖြင့် ဆန့်ကျင်တော်လှန်ကြရန် တိုက်တွန်းနှိုးဆော်ကြောင်း ဖော်ပြထားသည်။
ပုံစာ – ပြည်သူ့ရေးရာဝန်ဆောင်မှု Channel အသုံးပြုနည်းလမ်းညွှန်။

စစ်ကောင်စီအနေဖြင့် ပြည်သူများအား ပစ်မှတ်ထား တိုက်ခိုက်နေခြင်းထက် သတ္တိရှိရှိဖြင့် တော်လှန်ရေးသမားများနှင့်သာ တိုက်သင့်ဟု MSFC ၏ ပြောခွင့်ရ နိုင်မွန်စိုင်း ဆို

2 months ago

မတ် ၃၀
မွန်ပြည်နယ်၊ ကျိုက်မရောမြို့နယ် ဓမ္မသကျေးရွာကို စစ်ကောင်စီတပ်က တာဝေးပစ် လက်နက်ကြီးများဖြင့် ပစ်ခတ်ပြီး မီးတင်ရှို့ခဲ့သည့်ဖြစ်ရပ်အား လက်မခံနိုင်ကြောင်းနှင့် စစ်ကောင်စီအနေဖြင့် သတ္တိရှိရှိဖြင့် တော်လှန်ရေးသမားများနှင့်သာ တိုက်သင့်ကြောင်း မွန်ပြည်ဖက်ဒရယ်ကောင်စီ (MSFC) ၏ ပြောရေးဆိုခွင့်ရှိသူ နိုင်မွန်စိုင်းက ပြောသည်။
“ဒီလို အပြစ်မဲ့ပြည်သူတွေကို Target ထား တိုက်ခိုက်တာ ကျွန်တော်တို့ဘက်ကတော့ လက်မခံနိုင်ပါဘူး။ သတ္တိရှိရှိနဲ့ တော်လှန်ရေးသမားတွေနဲ့ တိုက်တာမျိုးပဲ ဖြစ်သင့်တယ်။ နောက်တခုကတော့ ဒီလိုမွန်ရွာတွေကို မီးရှို့တိုက်ခိုက်ခြင်းက ဒီဘက်မှာ ရှိတဲ့ တော်လှန်ရေးအဖွဲ့အစည်းတွေအနေနဲ့ အားလျော့သွားမှာတော့ မဟုတ်ဘူး။ ဒီလိုကိစ္စတွေကြောင့် တော်လှန်ရေးအဖွဲ့တွေကြားမှာ ပိုပြီး စုစည်းလာမယ်။ ပြည်သူတွေလည်း ပိုပြီး ထောက်ခံလာမယ်ဆိုတာ သေချာပါတယ်။ ကျွန်တော်တို့ကတော့ ဒီလို ဖြစ်ရပ်မျိုးတွေ ကြုံရတိုင်းမှာ ပြန်ပြီး တော်လှန်ကြမှာပါပဲ” ဟု ၎င်းက ဆိုသည်။
လက်ရှိတွင်လည်း အကြမ်းဖက်စစ်ကောင်စီက ဓမ္မသရွာနှင့် အနီးတဝိုက်ရွာများအား ရေကြောင်း၊ လေကြောင်း‌၊ ကုန်း‌ကြောင်းတို့မှ လက်နက်ကြီးများဖြင့် ပစ်ခတ်နေဆဲဖြစ်ကာ အဆိုပါရွာများမှ ဒေသခံများ စစ်ရှောင်နေကြရကြောင်း သိရသည်။
“ဇာသပြင် ၈၁ တပ်ရင်းကနေ လက်နက်ကြီးတွေ ပစ်နေတယ်။ သင်္ဘောနှစ်စီးကနေလည်း ပစ်တယ်။ နောက်ထပ် အနီးနား ရွာလေးငါးရွာကိုလည်း လေယာဉ်နဲ့ ပစ်တာတွေ ရှိတယ်။ အခုအဲဒီရွာတွေက စစ်ဘေးရှောင်တွေက ချောင်းဆုံတို့၊ မော်လမြိုင်ဘက်တို့မှာ ရှောင်နေကြရတယ်။ တော်တော်ကို ဆိုးပါတယ်။ နာရီခြားပြီး တနေကုန်ကို ပစ်နေတာ၊ တောက်လျှောက်ပဲ” ဟု ဒေသခံတစ်ဦးက ပြောသည်။
ယခုလို အပြစ်မဲ့ပြည်သူများအား Target ထား တိုက်ခိုက်မှုများမှာ စစ်တပ်၏ လုပ်ရိုးလုပ်စဉ်ဖြစ်ရပ်တခုသာ ဖြစ်ပြီး ယင်းလုပ်ရပ်ကြောင့် တော်လှန်ရေးက ပျက်ပြားသွားမည် မဟုတ်ဟုလည်း နိုင်မွန်စိုင်းက ဆိုသည်။
“ကျွန်တော်တို့က ၁၉၄၈ ခုနှစ်ကတည်းက ကျွန်တော်တို့ မွန်တွေ၊ ကရင်တွေ ကျွန်တော်တို့ အခွင့်အရေးအတွက် ကျွန်တော်တို့ တိုက်ပွဲဝင်ကြတဲ့ အခါမှာလည်း အဲဒီလိုပဲ ရွာတွေကို မီးရှို့ခဲ့တယ်။ ကျွန်တော်တို့ကို ဖိနှိပ်ခဲ့တယ်။ ဒါပေမယ့် ကျွန်တော်တို့ရဲ့ တော်လှန်ရေးက မပျက်ပြားသွားပါဘူး။ ဒါကြောင့် ဘယ်လိုပဲ ဖိနှပ်မှုတွေ လုပ်ပါစေ။ ကျွန်တော်တို့ရဲ့ တော်လှန်ရေးက ဆက်ပြီး ရှင်သန်နေမှာပါပဲ” ဟု ယင်းက ဆက်လက်ပြောသည်။
အကြမ်းဖက်စစ်ကောင်စီက ဓမ္မသရွာကို မတ် ၂၇ ရက်နေ့တွင်လေကြောင်း၊ ရေကြောင်း၊ ကုန်းကြောင်းမှနေ၍ တာဝေးပစ် လက်နက်ကြီးများဖြင့် ပစ်ခတ်ပြီး မီးတင်ရှို့ခဲ့ခြင်းကြောင့် လူနေအိမ်ခြေပေါင်း ၃၀၀ ကျော် ပျက်စီးခဲ့ရပြီး မွန်ပြည်သူအများစု အပါအဝင် ပြည်သူထောင်ချီ စစ်ဘေးရှောင်နေကြရသည်။
ပုံစာ – စစ်ကောင်စီက လက်နက်ကြီးပစ်ခတ် မီးတင်ရှို့ခဲ့သော ဓမ္မသရွာ။
Photo – CJ

နိုင်ကျဉ်းများဖြစ်သည့် ချောင်းဦး လူငယ်သပိတ်ခေါင်းဆောင် ကိုမာန်ဇာမြေမွန်နှင့် ကိုအောင်ကျော်ဇင် ရိုက်နှက် နှိပ်စက်ခံရပြီး ကိုအောင်ကျော်ဇင် ကျဆုံးခဲ့ရ

2 months ago

မတ် ၃၀
မုံရွာမြို့ အမှတ်(၁) ရဲစခန်းတွင် မတရားဖမ်းဆီးထိန်းသိမ်းခံထားရသော နိုင်ငံရေးအကျဉ်းသားများဖြစ်သည့် ချောင်းဦးမြို့နယ် လူငယ်သပိတ်ခေါင်းဆောင် ကိုမာန်ဇာမြေမွန်နှင့် ကိုအောင်ကျော်ဇင်တို့ ရိုက်နှက်နှိပ်စက်ခံရပြီး ကိုအောင်ကျော်ဇင် ကျဆုံးသွားကြောင်း မုံရွာလူထုသပိတ်တိုက်ပွဲ ဦးဆောင်ကော်မတီ၏ ထုတ်ပြန်ချက်အရ သိရသည်။
၂၀၂၄ ခုနှစ်၊ မတ် ၂၇ ရက်နေ့တွင် မုံရွာမြို့ အမှတ် (၁) ရဲစခန်း၌ မတရားဖမ်းဆီး ထိန်းသိမ်းခံထားရသော အကျဉ်းသားတစ်ဦး တရားရုံးမှ ရဲစခန်းအချုပ်သို့ ပြန်လည်ရောက်ရှိလာရာတွင် တရားမဝင်ပစ္စည်း သယ်ဆောင်လာသည်ဟူသော စွပ်စွဲချက်ဖြင့် ရဲတပ်သားများမှ ဝိုင်းဝန်းရိုက်နှက်မှုကြောင့် မတရားဖမ်းဆီးထိန်းသိမ်းခံထားရသော ချောင်းဦးမြို့နယ်လူငယ် သပိတ်ခေါင်းဆောင် ကိုမာန်ဇာမြေမွန်နှင့် ကိုအောင်ကျော်ဇင်တို့မှ ယခုကဲ့သို့ ကိုယ်ထိလက်ရောက် မတရားနှိပ်စက်ရန် မသင့်ကြောင်း ပြောဆိုခဲ့ကြောင်း၊ ထိုသို့ ပြောဆိုမှုကြောင့် မုံရွာမြို့ အမှတ် (၁) ရဲစခန်းမှ စခန်းမှူး ပြည့်လင်းအောင်နှင့် ဒု – ဗိုလ် ကျော်ဝင်းထွန်းတို့မှ ကိုမာန်ဇာမြေမွန်နှင့် ကိုအောင်ကျော်ဇင်တို့အား အကြမ်းဖက် အာဏာသိမ်းစစ်တပ် အထိုင်ချထားသော မြို့တော်ခန်းမသို့ မတ် ၂၈ ရက်နေ့တွင် ပို့ဆောင်ခဲ့ကြောင်း သိရသည်။
ယင်းသို့ ပို့ဆောင်ပြီး ကိုမာန်ဇာမြေမွန်နှင့် ကိုအောင်ကျော်ဇင်တို့အား မြို့တော်ခန်းမအတွင်းရှိ အကြမ်းဖက် အာဏာသိမ်းစစ်တပ်၏ စစ်သားများမှ ရိုက်နှက် နှိပ်စက်ခဲ့ပြီး ထိုသို့ ရိုက်နှက်နှိပ်စက်မှုကြောင့် နိုင်ငံရေးအကျဉ်းသား ကိုအောင်ကျော်ဇင်မှာ ၂၉ ရက်နေ့တွင် ကျဆုံးသွားခဲ့ကြောင်း သိရသည်။
ရိုက်နှက်နှိပ်စက်ခံထားရသည့် ကိုမာန်ဇာမြေမွန်မှာလည်း အသက်အန္တရာယ် စိုးရိမ်နေရပြီး ကျန်းမာရေးစောင့်ရှောက်မှု အမြန်ဆုံး ခံယူရန် လိုအပ်လျက်ရှိနေကြောင်း သိရသည်။
ထို့ကြောင့် ပြည်သူလူထုအနေဖြင့်လည်း အကျဉ်းထောင်အတွင်းရှိ နိုင်ငံရေးအကျဉ်းသားများ၏ အခြေအနေများအား အမြဲမပြတ်နားစွင့်ပြီး လိုအပ်သည့်အကူအညီများ ပေးကြပါရန်နှင့် ယခုဖြစ်စဉ်အား မှတ်တမ်းတင်ထားရှိပြီး ပြည်သူ့တရားစီရင်ရေးအချိန်ကာလ ရောက်ရှိချိန်တွင် ပါဝင်ပတ်သက်ခဲ့သူများကို တရားဥပဒေနှင့်အညီ အပြစ်ပေး အရေးယူသွားနိုင်ရန် ကြိုးပမ်းသွားမည်ဖြစ်ကြောင်း မုံရွာလူထုသပိတ်တိုက်ပွဲ ဦးဆောင်ကော်မတီက ထုတ်ပြန်‌ဖော်ပြထားသည်။
အဆိုပါကိစ္စရပ်နှင့်ပတ်သက်ပြီး ပိုမိုသိရှိနိုင်ရန် မုံရွာလူထုသပိတ်တိုက်ပွဲ ဦးဆောင်ကော်မတီသို့ ဆက်သွယ်မေးမြန်းထားသော်လည်း ပြန်လည် ဖြေကြားပေးနိုင်ခြင်း မရှိခဲ့ပါ။
ပုံစာ – ရိုက်နှက် နှိပ်စက်ခံထားရသော ကိုမာန်ဇာမြေမွန်။

ရခိုင်နှင့် မကွေးဒေသ လေးရက်တာ တိုက်ပွဲများအတွင်း စစ်ကောင်စီဘက်မှ ၃၃ ဦး သေဆုံးဟု AA အသိပေး ဘူးသီးတောင်၊ တောင်ဘဇာစခန်းအား AA သိမ်းပိုက်

3 months ago

မတ် ၂၉
မတ် ၂၅ ရက်မှ ၂၈ ရက်နေ့အတွင်း AA တပ်နှင့် စစ်ကောင်စီတပ်တို့ ရခိုင်ပြည် ဒေသအချို့နှင့် မကွေးတိုင်း ငဖဲမြို့နယ်တို့တွင် တိုက်ပွဲများဖြစ်ပွားခဲ့ပြီး စစ်ကောင်စီဘက်မှ ၃၃ ဦး သေဆုံးခဲ့ကြောင်း AA က သတင်းထုတ်ပြန်သည်။
မတ် ၂၅ ရက်နေ့၊ နံနက် ၁၁:၃၆ နာရီတွင် ဘူးသီးတောင်မြို့နယ်၊ ကျောက်ဖြူတောင်ရွာ၏ တောင်ဘက် ၄ ကီလိုမီတာခန့်အကွာ ဘူးသီးတောင် မောင်တောကျော်လမ်း၌ အကြမ်းဖက်စစ်ကောင်စီ၏ ဘူးသီးတောင်ဗျူဟာလက်အောက်ခံ၊ ခလရ (၂၃၄) တပ်ရင်းမှ အင်အား ၅၀ ခန့်ရှိ စစ်ကြောင်းနှင့် AA တို့ မိနစ်အနည်းငယ်ကြာ တိုက်ပွဲဖြစ်ပွားခဲ့ရာ တိုက်ပွဲအတွင်း စကစဘက်မှ မျက်မြင် ၈ ဦး သေဆုံးခဲ့ကြောင်း၊ ယင်းနေ့တွင်ပင် ဘူးသီးတောင်မြို့နယ်၊ တောင်ဘဇာစခန်းအား သိမ်းပိုက်ရရှိခဲ့ကြောင်း သိရသည်။
ထို့အတူ ရခိုင်ဒေသအတွင်း၌ လက်နက်ချအညံ့ခံရန် ဆိုထားသော်လည်း ယခုအချိန်အထိ လက်နက်ချ အညံ့မခံသေးသော ဖက်ဆစ် အကြမ်းဖက်စစ်ကောင်စီ၏ ရခိုင်ဒေသဌာနချုပ် (တနည်း) အနောက်ပိုင်းတိုင်းစစ်ဌာနချုပ် တည်ရှိရာ အမ်းမြို့နယ်၊ လုံးကျေးရွာ၏ အနောက်ဘက် မီတာ ၁၄၀၀ ခန့် အကွာတွင် AA နှင့် အကြမ်းဖက်စစ်ကောင်စီတို့ မတ် ၂၆ ရက်နေ့က တိုက်ပွဲဖြစ်ပွားခဲ့ကြောင်း၊ စစ်ကောင်စီ၏ စကခ (၅) လက်အောက်ခံ ခမရ (၃၄၆) နှင့် တခြားတပ်များမှ စုပေါင်းထားသော စစ်ကြောင်းနှင့် AA တပ်တို့သည် မတ် ၂၆ ရက်နေ့၊ နံနက် ၁၀:၁၈ နာရီတွင် တိုက်ပွဲဖြစ်ပွားခဲ့ပြီး မိနစ် ၃၀ ခန့်ကြာမြင့်ခဲ့ကြောင်း သိရသည်။
စစ်ကောင်စီတပ်သည် ဒရုန်း၊ လေကြောင်းပစ်ကူနှင့် မြေပြင်လက်နက်ကြီးပစ်ကူများပေး၍ တိုက်ခိုက်ခဲ့သော်လည်း နာရီဝက်ခန့်တိုက်ပွဲအတွင်း ယင်းတို့ဘက်မှ ၁၅ ဦးခန့် သေဆုံးကာ ၁၅ ဦးခန့် ဒဏ်ရာရရှိခဲ့ပြီး တိုက်ပွဲအတွင်း လက်နက်ခဲယမ်းအချို့ကိုလည်း သိမ်းဆည်းရမိခဲ့သည်ဟု ဆိုသည်။
ယင်းအပြင် မကွေးတိုင်း၊ ငဖဲမြို့နယ်တွင် AA တပ်နှင့် စစ်ကောင်စီတပ်တို့ တိုက်ပွဲဖြစ်ပွားခဲ့ပြီး စကစ ၁၀ ဦး မျက်မြင်သေဆုံးခဲ့ကြောင်းလည်း သိရသည်။
ပြီးခဲ့သည့် မတ် ၂၆ ရက်နေ့၊ နံနက် ၁၀:၄၈ နာရီတွင် ငဖဲမြို့နယ်၊ တုံးကြီးကျေးရွာ၏ အရှေ့မြောက်ဘက် မီတာ ၁၅၀၀ ခန့်အကွာ၌ အကြမ်းဖက်စစ်ကောင်စီတပ်၏ အင်အား ၄၀ ခန့်ပါစစ်ကြောင်းနှင့် AA တို့ နာရီဝက်ခန့်ကြာ တိုက်ပွဲဖြစ်ပွားခဲ့ပြီး အကြမ်းဖက်စစ်ကောင်စီဘက်မှ မျက်မြင် ၄ ဦး သေဆုံးကာ ၈ ဦးခန့် ဒဏ်ရာရရှိခဲ့ကြောင်း၊ မတ် ၂၈ ရက်နေ့၊ နံနက် ၈:၅၈ နာရီတွင်လည်း ငဖဲမြို့နယ်၊ ချောင်းဖျားရွာ၏ တောင်ဘက် မီတာ ၇၀၀ ခန့်အကွာ တောင်ကြော၌ အင်အား ၅၀ ဦးခန့်ပါ စကစ စစ်ကြောင်းနှင့် မိနစ်အနည်းငယ်ကြာ တိုက်ပွဲဖြစ်ပွားခဲ့ပြီး စကစဘက်မှ မျက်မြင် ၆ ဦး သေဆုံးကာ ဒဏ်ရာရရှိသူ ၁၀ ဦးခန့် ရှိခဲ့ကြောင်း၊ တိုက်ပွဲအတွင်း လက်နက်နှင့် ခဲယမ်းအချို့ကိုလည်း သိမ်းဆည်းရမိခဲ့ကြောင်း သိရသည်။
May be an image of map, road and text
အလားတူ မတ် ၂၈ ရက်နေ့၊ နံနက် ၈:၄၅ နာရီတွင် မြေပုံမြို့နယ်၊ လီသွန်ကျေးရွာ၏ အရှေ့မြောက်ဘက် မီတာ (၂၄၀၀) ခန့်အကွာ တောင်ကြော၌ အကြမ်းဖက်စစ်ကောင်စီ၏ အမှတ် (၃) နည်းဗျူဟာစစ်ဆင်ရီးကွပ်ကဲမှုလက်အောက်ခံ၊ ခမရ (၅၆၃) တပ်ရင်းနှင့် ရက္ခိုင့်တပ်တော်တို့ မိနစ်အနည်းငယ်ကြာ တိုက်ပွဲဖြစ်ပွားခဲ့သည်ဟု သိရသည်။
လက်ရှိတွင်လည်း ရခိုင်ပြည်၊ မောင်တောမြို့၊ ကြိမ်ချောင်းနယ်ခြားစောင့်တပ်စခန်းအား အပြီးသတ် သိမ်းပိုက်ရယူနိုင် ရေးအတွက် ထိုးစစ်အရှိန်ကို တဆင့်ပြီးတဆင့် မြှင့်ကာ တိုက်ခိုက်လျက်ရှိပြီး စစ်ကောင်စီဘက်မှလည်း လေကြောင်း၊ လက်နက်ကြီးပစ်ကူအများအပြားနှင့် မရပ်မနားအသည်းအသန် ခုခံလျက်ရှိသည်ဟု ဖော်ပြထားသည်။

စစ်မှုထမ်းဥပဒေကို အား‌ပေးကူညီသူ အားလုံးအား ရန်သူအဖြစ် သတ်မှတ်ကာ ကြီးလေးသည့် ပြစ်ဒဏ်များ ချမှတ်သွားမည်ဟု MSRF အသိပေး

3 months ago

“လက်နက်ကိုင်ထားတယ်ဆိုရင် စစ်ကောင်စီရဲ့ မိတ်ဆွေဖြစ်တယ်။ ရန်သူအဖြစ် ကျွန်တော်တို့ သတ်မှတ်မယ်”
======
မတ် ၂၉
စစ်ကောင်စီ၏ စစ်မှုထမ်းဥပဒေ အကောင်အထည်‌ဖော်ရန် ဝိုင်းဝန်းကူညီပံ့ပိုးသူ အားလုံးသည် စစ်ကောင်စီ သက်ဆိုးရှည်ရန်အတွက် အထောက်အကူပြုနေကြသူများဖြစ်၍ ရန်သူအဖြစ် သတ်မှတ်ကာ ကြီးလေးသည့် ပြစ်ဒဏ်များ ပြင်းပြင်းထန်ထန်ချမှတ်သွားမည်ဟု မွန်ပြည်တော်လှန်ရေးတပ် (MSRF)မှ ပြောခွင့်ရ နိုင်နဂါးက ပြောသည်။
“စစ်မှုထမ်းဥပဒေကို ဝိုင်းဝန်းကူညီပံ့ပိုးသူ အားလုံးက စစ်ကောင်စီသက်ဆိုးရှည်ဖို့အတွက် အထောက်အကူပြုနေကြတဲ့သူတွေဖြစ်တယ်လို့ ကျွန်တော်တို့ သတ်မှတ်တယ်။ အခုလို စစ်ကောင်စီ အင်အားတိုးဖို့အတွက် ပြည်သူတွေကို ပိုပြီး ဒုက္ခပေးနိုင်ဖို့အတွက် အာဏာရှင်အမြစ်ပြတ် ချေမှုန်းရေးကို ကြန့်ကြာစေမယ့် လုပ်ရပ်တွေအားလုံးကို ရပ်လိုက်ကြပါလို့ သတိပေးလိုပါတယ်” ဟု ၎င်းက ဆိုသည်။
ယင်းအပြင် လက်နက်ကိုင်ဆောင်ထားသော ရပ်ကွက်/ကျေးရွာ အုပ်ချုပ်ရေးမှူးများအနေဖြင့်လည်း လက်နက်များကို ပြန်လည်အပ်ကြရန်နှင့် သို့မဟုတ်ပါက ရန်သူအဖြစ်သတ်မှတ်ကာ ချေမှုန်းသွားမည်ဟုလည်း နိုင်နဂါးက ပြောသည်။
“နောက်တခုရှိတာက စစ်ကောင်စီက ထုတ်ပေးထားတဲ့ လက်နက်နဲ့ ပြည်သူတွေကို ခြိမ်းခြောက်နေတဲ့ ရပ်ကွက်/ကျေးရွာ အုပ်ချုပ်ရေးမှူးတွေ အားလုံးကိုလည်း ထပ်ပြီး အသိပေးချင်တာက အဲဒီလက်နက်ကို ပြန်အပ်လိုက်ပါ။ မဟုတ်ရင်တော့ ကျွန်တော်တို့ မူဝါဒအရ စစ်ကောင်စီနဲ့အတူ တွဲပြီးတော့ လက်နက်ကိုင်ထားတယ်ဆိုရင် စစ်ကောင်စီရဲ့ မိတ်ဆွေဖြစ်တယ်။ စစ်ကောင်စီနဲ့အတူ လုပ်ဆောင်နေတဲ့လူအဖြစ် ကျွန်တော်တို့ သတ်မှတ်မယ်။ ရန်သူအဖြစ် သတ်မှတ်တယ်။ အဲဒီတော့ စစ်ကောင်စီရဲ့ စစ်မှုထမ်းဥပဒေကို ထောက်ခံပြီးတော့ ဝိုင်းဝန်းကူညီနေကြတဲ့ ထွေအုပ်တွေ၊ ကျေးရွာ/ရပ်ကွက် အုပ်ချုပ်ရေးမှူးတွေကို ပြင်းပြင်းထန်ထန် သတိပေးလိုတယ်။ ဆက်လက်ပြီး လုပ်ဆောင်နေမယ်ဆိုရင် ကြီးလေးတဲ့ ပြစ်ဒဏ်ကို ခံရမယ်။ လက်ထဲမှာ လက်နက်ရှိရင် စစ်ကောင်စီကို ချေမှုန်းသလို ထွေအုပ်တွေကိုလည်း ရန်သူလိုပဲ သတ်မှတ်မယ်လို့ ကျွန်တော်ပြောချင်ပါတယ်” ဟု ယင်းက ဆက်လက် အသိပေး ပြောကြားသည်။
လက်ရှိ မွန်ပြည်နယ်တွင် စစ်မှုထမ်းဥပဒေကို အားပေးကာ အကောင်အထည်ဖော်သူတိုင်းအား ပြင်းထန်စွာ အရေးယူသွားမည်ဟု ‌ဒေသတော်လှန်ရေးအဖွဲ့များက သတိပေးထားကြပြီး‌နောက် ရပ်ကွက်/ကျေးရွာ အုပ်ချုပ်ရေးမှူး၊ ဒလန် တချို့ ရှင်းလင်းခံထားရသည်များလည်း ရှိလာသည်။
“ကျိုက်ထိုမှာ လက်နက်ကိုင် ဘုန်းကြီးကို ရှင်းလိုက်တဲ့ ရုပ်သံကလည်း တော်တော်လေး ဂယက်ရိုက်နေတယ်။ ရှင်းလိုက်တယ်ဆိုတာတွေက သတင်းတွေ တက်လာပေမယ့် အခုလို ရုပ်သံ သေချာရိုက်ပြီး ရှင်းလင်းလိုက်တာက ပိုပြီး အုပ်ကြီးတွေအတွက်တော့ ပိုပြီး အခြေအနေဆိုးသွားစေတာပေါ့” ဟု မွန်ဒေသခံတစ်ဦးက ဆိုသည်။
ယင်းသို့ စစ်မှုထမ်းဥပဒေကို အားပေးကူညီသူများအား ဆက်တိုက်ရှင်းလင်းလာမှုများကြောင့် အုပ်ချုပ်ရေးမှူးအချို့ နုတ်ထွက်စာများ တင်လာကြသည်ဟူ၍လည်း မီဒီယာအချို့တွင် ဖော်ပြထားချက်အရ သိရသည်။