အောင်လအန်ဆန် – ၈၉ စက္ကန့်နဲ့ပြိုင်ဘက်ကို အလဲထိုးသူ

သောကြာ, မေ 5th, 2023

‘‘အမဲလိုက်အက၊ ခွန်အားရှိမှ၊ ဆုတံဆိပ်တွေ ရလိမ့်မယ် …’’ ဆိုတဲ့ နာမည်ကြီးအဆိုတော်လေးဖြူရဲ့ အမဲလိုက်အက သီချင်းသံ တပိုင်းတစဟာ မြန်မာ့မြေမဟုတ်တဲ့ ထိုင်းနိုင်ငံ၊ ဘန်ကောက်မြို့က Impact Arena အားကစားရုံတွင်းရောက်နေတဲ့ ပရိသတ်တွေကြား အကျယ်ဆုံးကြားရတဲ့သံပြိုင်သီဆိုမှုဖြစ်ပါတယ်။

မြန်မာ့ စပါးအုံးလို့ နာမည်ကျော်တဲ့ အောင်လအန်ဆန် တစ်ယောက် ဘရာဇီးတိုက်ခိုက်ရေးသမား ဂီလ်ဘာတို ဂယ်ဗောင်းကို ယှဥ်ပြိုင်ထိုးသတ်ဖို့ ကွင်းထဲဆင်းလာချိန် ကစားသမား မိတ်ဆက်အဖွင့်သီချင်းကို ပရိသတ်တွေက အတူသီဆိုခဲ့ကြတာပါ။

သိုင်းပေါင်းစုံ လက်ဝှေ့သမား အောင်လအန်ဆန်ဟာ ဘရာဇီးဖိုက်တာ ဂီလ်ဘာတိုနဲ့ One Championship ပြိုင်ပွဲရဲ့ ကိုယ်ခံပညာစုံ တိုက်ခိုက်ရေး (One Fight Night -6) ပွဲစဉ်တစ်ပွဲအနေနဲ့ ဇန်နဝါရီ ၁၄ ရက် မနက်ပိုင်းတုန်းက ယှဥ်ပြိုင် ထိုးသတ်ခဲ့တာဖြစ်ပါတယ်။

ထိုင်း တောဝက်ဘောလုံးအသင်းက လူငယ်ဘောလုံးသမား ဒွန် ဗြိတိန်မှာ သေဆုံး

သောကြာ, မေ 5th, 2023

ထိုင်းနိုင်ငံမြောက်ပိုင်း၊ ချင်းရိုင်ခရိုင်ထဲက ထမ့်လွန်နန့်နွန်ဂူထဲ ပိတ်မိရာကနေ အသက်ရှင်လျက် ကယ်ဆယ်နိုင်ခဲ့တဲ့ တောဝက်ဘောလုံးအသင်းအဖွဲ့ဝင်တွေထဲက နွန်ဒွန်ဆိုတဲ့လူငယ်ဟာ ဗြိတိန်နိုင်ငံမှာ ကွယ်လွန်သွားပြီလို့ ကနဦး သိရှိရပါတယ်။

အဲဒီလူငယ်သေဆုံးတယ်ဆိုတဲ့သတင်းကို သူ့ကို ပညာသင်ဆုချီးမြှင့်ခဲ့တဲ့ ဇီကို ဖောင်ဒေးရှင်းအဖွဲ့ကနေ အစောပိုင်းတုန်းက သတင်းထုတ်ပြန်လိုက်တာဖြစ်ပါတယ်။ သေဆုံးရတဲ့အကြောင်းရင်းကိုတော့ ဆက်လက်ထုတ်ပြန်မယ်လို့ ဆိုပါတယ်။

အသက် ၁၇ နှစ်အရွယ် နွန်ဒွန်ဟာ ဦးခေါင်းကို ထိခိုက်မိတဲ့ မတော်တဆမှုနဲ့ သေဆုံးတယ်ဆိုတဲ့ သတင်းတွေ ထွက်ပေါ်နေပါတယ်။

အဆောင်မှာ သတိမေ့နေတဲ့သူ့ကို တနင်္ဂနွေနေ့တုန်းက ဆေးရုံပို့ခဲ့ပြီးတဲ့နောက် ဆေးရုံမှာပဲ မနေ့ ဖေဖော်ဝါရီလ ၁၄ ရက်မှာသေဆုံးခဲ့တာလို့ သူ့မိသားစုနဲ့နီးစပ်သူတွေက ဘီဘီစီကိုပြောပါတယ်။

သူဟာ ပြီးခဲ့တဲ့နှစ် နှောင်းပိုင်းကစလို့ လက်စတာရှိုင်းအရပ်က ဘရွတ်ဟောက်စ် ကောလိပ် ဘောလုံးသင်တန်းကျောင်းမှာ တက်ရောက်နေတာဖြစ်ပါတယ်။

သူဟာ ဂူထဲမှာ ပိတ်မိနေခဲ့တဲ့ တောဝက်ဘောလုံးအသင်းရဲ့ အသင်းခေါင်းဆောင်ဖြစ်လည်းဖြစ်ပါတယ်။

ပြီးခဲ့တဲ့နှစ် သြဂုတ်လမှာ ဗြိတိန်မှာရှိတဲ့ ဘောလုံးသင်တန်းကျောင်းကို ဝင်ခွင့်ရတုန်းက ‘’ကျွန်တော့် အိပ်မက် တကယ်ဖြစ်လာပါပြီ’’ လို့ သူ့ရဲ့ လူမှုကွန်ရက် အင်စတာဂရမ်အကောင့်မှာ ရေးသားခဲ့ပါသေးတာကြောင့် သူ့ သူအသင်းဖော်တွေဆီလည်း အပျော်တွေ ကူးစက်ခဲ့ပါတယ်။

အခုတော့ ၆ လကျော်ကျော်လေးမှာပဲ သူ့အသင်းဖော်တွေဟာ ဒွန်ကို ဆုံးရှုံးလိုက်ရလို့ ဝမ်းနည်းနေကြရပါပြီ။

ဒွန်သေဆုံးမှု သတင်းဟာ သူ့ဇာတိမြို့ ချင်းရိုင်က သူတို့အသင်းသားတွေ မကြာခဏသွားလေ့ရှိတဲ့ ဒိုင်ဝေါင်ဘုန်းကြီးကျောင်းကို သူ့ရဲ့မိခင်ဖြစ်သူက အကြောင်းကြားခဲ့ပါတယ်။

‘ဒွန် တစ်ယောက် ကောင်းရာမွန်ရာရောက်ပါစေ’’လို့ အဲဒီဘုန်းကြီးကျောင်းက ဖေ့ဘွတ်ခ် လူမှုကွန်ရက်ပေါ် တင်ပြီး ဆုတောင်းခဲ့ပြီးနောက်မှာပဲ သူ့ရဲ့ အသင်းသားတွေကလည်း ဆုတောင်းစာတွေ ရေးလာကြပါတယ်။

‘နိုင်ငံ့အသင်းအတွက် ကစားမယ့်နေ့ကို စောင့်ကြည့်ဖို့ ငါ့ကို မင်းပြောခဲ့တယ်။ အဲဒီအချိန်အထိ မင်းရှိဦးမှာလို့ ယုံထားခဲ့တာ’’ ဆိုပြီး ဒွန်နဲ့အတူ ၂၀၁၈ ခုနှစ်မှာ ဂူထဲကနေ ကယ်ဆယ်ခံခဲ့ရသူ တစ်ဦးဖြစ်တဲ့ ပရာချက် ဆူသမ်က ရေးပါတယ်။

‘မင်း အင်္ဂလန်ကို မသွားခင် ငါတို့ နောက်ဆုံး ဆုံတုန်းက မင်း ပြန်လာတဲ့အခါ ငါ (ပရိသတ်)အနေနဲ့ မင်းရဲ့လက်မှတ်တောင် တောင်းရလိမ့်မယ်ဆိုပြီး အရွှန်းဖောက် ပြောခဲ့သေးတယ်။ အခုတော့ ကောင်းရာမွန်ရာမှာ နားပါတော့။ ငါတို့ အားလုံးဟာ အမြဲတမ်း ၁၃ ယောက်ဖြစ်နေမှာပါ’’လို့ သူ့ရဲ့နောက်ထပ် အသင်းဖော် တစ်ဦးကလည်း ပြောပါတယ်။

နွန်ဒွန်ဟာ ပြီးခဲ့တဲ့ ၂၀၁၈ ခုနှစ်၊ ဇွန်လမှာ မိုးကြီးရေလျှံလို့ ထမ့်လွန်နန့်နွန်ဂူထဲမှာ ပိတ်မိနေခဲ့တဲ့ တောဝက်ဘောလုံးအသင်းကစားသမား ကလေး ၁၂ ယောက် နဲ့ နည်းပြ ၁ ဦး စုစုပေါင်း ၁၃ ဦးထဲက ၁ ဦးဖြစ်ပါတယ်။

တောဝက် ဘောလုံးအသင်းသား ၁၂ ယောက်နဲ့ သူတို့ နည်းပြတို့ကို သီတင်း ၂ ပတ်ကျော်ကြာမှာ ဂူထဲကနေ ပြန်ကယ်ဆယ်နိုင်ခဲ့တာဖြစ်ပါတယ်။

နည်းပြဖြစ်သူ အေကဖွန်း ဟာ ရှမ်းပြည်နယ် တာချီလိတ်မြို့ မှာနေထိုင်သူဖြစ်ပြီး တောဝက်အသင်းသားထဲက အိုက်လူးခေါ် အိုက်ဒွန်းဆိုတဲ့လူငယ်ဟာ ဝ တိုင်းရင်းသားဖြစ်ပါတယ်။

၁၈ ရက်နီးပါးအကြာမှာ သူတို့ကို ကယ်ဆယ်ရေးအဖွဲ့တွေက ခက်ခက်ခဲခဲနဲ့ အသက်ရှင်လျှက် ကယ်ထုတ်ခဲ့ရပြီး သူတို့ကို ကယ်ဆယ်မှုဟာ ကမ္ဘာကျော်ခဲ့တဲ့ဖြစ်ရပ် ဖြစ်ခဲ့ပါတယ်။

မန်ချက်စတာယူနိုက်တက် – ဝယ်ချင်သူတွေကို အိုးလ်ထရက်ဖို့ဒ် လာခဲ့ဖို့ ဖိတ်ကြာ

သောကြာ, မေ 5th, 2023

မန်ချက်စတာ ယူနိုက်တက် အသင်းကို ဝယ်ယူဖို့ ကြိုးစားနေကြသူတွေနဲ့ ကြီးကြီးမားမား ရင်းနှီးမြှုပ်နှံလိုသူတွေကို လာမယ့် သီတင်း ၂ ပတ်အတွင်း အိုးလ်ထရက်ဖို့ဒ်ကို လာပြီး တွေ့ဆုံကြဖို့အတွက် အသင်း အကြီးအကဲတွေက ဖိတ်ကြားထားပြီ ဖြစ်ပါတယ်။

အဲဒီအထဲမှာ အင်းနီးယော့စ် ကုမ္ပဏီ ပိုင်ရှင် ဆာ ဂျင်မ် ရက်ကလစ်ဖ်နဲ့ ကာတာက ရှိတ်ခ် ဂျဆင်းမ် ဘင် ဟာမက်ဒ် အဲလ် သာနီ တို့လည်း ပါဝင်ကြပါတယ်။ ဂလေဇာမိသားစုက အသင်းကို လုံးလုံးလျားလျား ရောင်းချဖို့အတွက် လုပ်ရင် ဝယ်ယူနိုင်မယ့်သူတွေထဲမှာ သူတို့ ၂ ဖွဲ့က ရှေ့က ပြေးနေပါတယ်။

အခု အိုးလ်ထရက်ဖို့ဒ်ကို ဖိတ်ကြားပြီး အသင်းနဲ့ ပတ်သက်တာတွေကို ပြသတင်ပြကြမယ့် အထဲမှာ အသင်းဝင်ငွေတိုးဖို့ ဘယ်လို ဘယ်ပုံ လုပ်နိုင်ကြမလဲ ဆိုတာတွေလည်း ပါဝင်ပါတယ်။

ရက်ကလစ်ဖ် အဖွဲ့က ဒီသီတင်းပတ် ကုန်ပိုင်းမှာ လာရောက်ကြမှာ ဖြစ်ပါတယ်။ ဒါပေမယ့် အသက် ၇၀ ရှိပြီ ဖြစ်တဲ့ ဗြိတိသျှ ဘီလျံနာ သူဌေးကြီး ကိုယ်တိုင်လာမလား ဆိုတာတော့ မသိရသေးပါဘူး။ ရှိတ်ခ် ဂျဆင်းမ်ရဲ့ အဖွဲ့ကလည်း လာမယ့် သီတင်းပတ်ထဲမှာ ရောက်လာကြမှာ ဖြစ်ပါတယ်။

နောက်ထပ် အသင်းကို ဝယ်ယူဖို့ ထပ်ပြီး ကမ်းလှမ်းလာတဲ့ အဖွဲ့တွေ ရှိသေးလား ဆိုတာတော့ မသိရသေးပါဘူး။ ဒါပေမယ့် ယူနိုက်တက်မှာ တစိတ်တပိုင်း ရင်းနှီးမြှုပ်နှံလိုတယ်လို့ ပြောလာတဲ့ အဖွဲ့တွေတော့ ရှိပါတယ်။

နောက်ပြီး ရင်းနှီးမြှုပ်နှံမှု လုပ်တဲ့ အဲလ်လိယက် ဂရု ဆိုတဲ့ အဖွဲ့ကလည်း အသင်းကို ဝယ်ယူဖို့ ကမ်းလှမ်းသူတွေကိုသာမကဘဲ တကယ်လို့သာ ဂလေဇာမိသားစု စိတ်ပြောင်းပြီး ရင်းနှီးမြှုပ်နှံမှု အသစ်တွေပဲ ထပ်ထည့်မယ် ဆိုရင်ရော ငွေထုတ်ပေးမယ်ဆိုပြီး ပြောထားပါတယ်။

သိသင့် သိထိုက်တာတွေကို တင်ပြပြီးတဲ့ အခါမှာ အခု အရောင်းအဝယ်ကိစ္စကို ကိုင်တွယ်နေတဲ့ ရိန်း ဂရုက နောက်ထပ် ကမ်းလှမ်းမှုအသစ်တွေ ထပ်တင်ပြကြဖို့ တောင်းဆိုလာနိုင်ပါတယ်။ ကနဦး ကမ်းလှမ်းချက်တွေက ဝယ်ယူဖို့ စိတ်ဝင်စားကြောင်း အဆိုပြုတဲ့ သဘောမျိုးသာ ဖြစ်ပါတယ်။

ကလပ်အသင်းဘက်က အသင်းသားတွေနဲ့ ပတ်သက်တဲ့ အချက်အလက်တွေ၊ စာချုပ်တွေနဲ့ စပွန်ဆာတွေနဲ့ ပတ်သက်တဲ့ အချက်အလက်တွေကိုလည်း ဝယ်ယူလိုသူတွေ အပြည့်အဝ လေ့လာနိုင်ဖို့ ခွင့်ပြုထားပါတယ်။

မန်ချက်စတာ ယူနိုက်တက် အသင်းကို ဝယ်ယူဖို့စိတ်ဝင်စားတဲ့ သူတွေ ကမ်းလှမ်းဖို့ အတွက် သတ်မှတ်ထားပေးတဲ့ နောက်ဆုံးရက်ကို ကျော်လွန်ခဲ့တာ သီတင်း ၃ ပတ်လောက် ရှိနေပြီ ဖြစ်ပါတယ်။ အခုအချိန်ကစပြီး ဒီအရောင်းအဝယ်ကိစ္စတွေက အရှိန်ပိုရလာနိုင်ပါတယ်။ ဒါပေမယ့် အရင်က ရည်မှန်းထားသလို မတ်လကုန်ပိုင်းမှာ အရောင်းအဝယ် ဖြစ်ဖို့ကတော့ ဖြစ်နိုင်ခြေနည်းပါတယ်။

ဂလေဇာမိသားစုဘက်က ဘာလုပ်မလဲ ဆိုတာနဲ့ ပတ်သက်လို့ ခုထက်ထိ ကွဲပြားသေချာစွာ မသိရသေးပါဘူး။ ယူနိုက်တက်ရဲ့ တွဲဘက် ဥက္ကဋ္ဌ ဂျိုးလ် နဲ့ အဲဗရမ် ဂလေဇာတို့က အသင်းရဲ့ တစိတ်တပိုင်း ကိုဆက်ပြီး ကိုင်ထားချင်နေကြပေမယ့် အသင်း ဒါရိုက်တာတွေ အဖြစ် နေရာယူထားကြတဲ့ ကျန် မွေးချင်း ၄ ယောက်ကတော့ ဒီလို မလုပ်ချင်ကြဘူးလို့ ဆိုပါတယ်။

ဂယ်ရီလိုင်နကာ ဘီဘီစီကို ပြန်လာမယ်

သောကြာ, မေ 5th, 2023

အင်္ဂလန်ရဲ့ ဩဇာကြီး ဘောလုံး တိုက်စစ်မှူးဟောင်းလည်းဖြစ်၊ ဘီဘီစီရဲ့ အဓိက ဘောလုံးသုံးသပ်မှု အစီအစဥ်ကို နှစ်ရှည်လများ စီစဥ် တင်ဆက်သူအနေနဲ့ ဦးဆောင် လုပ်ဆောင်နေခဲ့တဲ့ ဂယ်ရီလိုင်နကာ Gary Lineker ဘီဘီစီမှာ ပြန်လည်တင်ဆက်ဖို့ ဘီဘီစီတာဝန်ရှိသူတွေနဲ့ကြား သဘောတူမှု ရပြီဖြစ်ပါတယ်။

“ဂယ်ရီဟာ ဘီဘီစီအတွက် အဖိုးထိုက်တန်လှတဲ့ အစိတ်အပိုင်းဖြစ်သလို၊ ဂယ်ရီ့ အနေနဲ့လည်း ဘီဘီစီကို ဘယ်လောက် တန်ဖိုးထားတယ် ဆိုတာ ကျွန်တော် သိပါတယ်။ အခုလာမယ့် သီတင်းပတ်ကုန် အစီအစဥ်မှာ သူ ပြန်လည် တင်ဆက်မှာကို စောင့်ကြိုနေပါတယ်” ဆိုပြီး ဘီဘီစီရဲ့ ဒါရိုက်တာ ဂျင်နရယ် တင်မ် ဒေးဗီးက ပြောပါတယ်။

ဘီဘီစီ အနေနဲ့ ချမှတ်ထားတဲ့ ဝန်ထမ်းတွေ လိုက်နာရမယ့် ဆိုရှယ်မီဒီယာ အသုံးပြုမှု လမ်းညွှန်ကိုလည်း လွတ်လပ်တဲ့ ပြန်လည် သုံးသပ်မှုတွေ ပြုလုပ်သွားမယ်လို့ ဘီဘီစီရဲ့ ထုတ်ပြန်ချက်ထဲ ဒါရိုက်တာ ဂျင်နရယ် တင်မ် ဒေးဗီးက ဆိုထားပါတယ်။

အထူးသဖြင့် ဂယ်ရီ လိုင်နကာတို့လို သတင်းနဲ့ မျက်မှောက်ရေးရာ ကဏ္ဍက မဟုတ်ဘဲ လွတ်လပ်တဲ့ ကန်ထရိုက် စာချုပ်တွေနဲ့ အလုပ်လုပ်နေကြသူတွေနဲ့ ပတ်သက်ပြီး ဆိုရှယ်မီဒီယာတွေပေါ် ဘယ်လိုမျိုး ပြုမူသင့်သလဲ ဆိုတဲ့ ရှိလက်စ လမ်းညွှန် အချက်အလက်တွေ အပေါ် အာရုံစိုက်ပြီး ပြန်လည် သုံးသပ် သွားမှာ ဖြစ်တယ်လို့ ဆိုပါတယ်။

အဲဒီလို သုံးသပ်နေချိန်မှာ ရှိလက်စ လမ်းညွှန်ချက်တွေနဲ့ အညီ ပြုမူသွားဖို့ကိုလည်း ဂယ်ရီ့ဘက်က သဘောတူပါတယ်။