ဟိုပင်မြို့တွင် အိမ်ထောင်ရှိအမျိုးသမီးတစ်ဦးမုဒိန်းကျင့်သတ်ဖြတ်ခံရ၊ ခင်ပွန်းဖြစ်သူကိုပါ ဓားဖြင့်ထိုးသတ်ခဲ့ (ဟိုပင်၊ ဇွန် ၁၆)

Friday, June 16th, 2023

ကချင်ပြည်နယ် ဟိုပင်မြို့တွင် အိမ်ထောင်ရှိအမျိုးသမီးတစ်ဦး မုဒိန်းကျင့်သတ်ဖြတ်ခံခဲ့ရကာ ခင်ပွန်းဖြစ်သူကိုပါ ဓားဖြင့်ထိုးသတ်မှုဖြစ်ပွားခဲ့ကြောင်း‌ဇွန်လ ၁၆ရက်က လူမှုကူညီရေးအဖွဲ့အစည်းများထံမှ သိရသည်။
အဆိုပါ သေဆုံးသူများသည် တောင်ယာလုပ်ကိုင်စားသောက်သူများဖြစ်ပြီး အမျိုးသားမှာ အသက် ၃၅နှစ်နှင့် အမျိုးသမီးဖြစ်သူမှာ အသက် ၃၄နှစ်ရှိပြီဖြစ်ကြောင်း၊ ဇွန်လ ၁၃ ရက်နေ့က တောင်ယာလုပ်ကိုင်ရန် သွားရောက်ပြီးနောက် နေအိမ်သို့ ပြန်လာခြင်းမရှိသည့်အတွက် လိုက်လံရှာဖွေခဲ့ကြကြောင်း၊ သေဆုံးသူများအား ၎င်းတို့ပိုင်တောင်ယာခင်းတွင် ဓားဒဏ်ရာများဖြင့် တွေ့ရှိခဲ့ခြင်းဖြစ်ကြောင်း သိရသည်။
“ပြန်တွေ့တာကတော့ သူတို့ရဲ့တောင်ယာထဲမှာပဲ တွေ့တာ။ အမျိုးသမီးကတော့ မုဒိန်းကျင့်ခံရတဲ့ ပုံစံမျိုးနဲ့‌တွေ့ရတယ်။ သူ့ရဲ့အမျိုးသားကိုလည်း သူရဲ့ဘေးမှာပဲ ဓားဒဏ်ရာတွေနဲ့ သေဆုံးနေတာကို တွေ့ရတာ” ဟု ကချင်ပြည်နယ် ဟိုပင်မြို့နယ်ရှိ လူမှုကူညီရေးအသင်းတစ်ခုမှ တာဝန်ရှိသူတစ်ဦးက ပြောသည်။
အသတ်ခံသည့် ဇနီးမောင်နှံတွင် အသက် နှစ်နှစ်အရွယ်နှင့် ခြောက်နှစ်အရွယ်ကလေးနှစ်ဦးကျန်ရှိခဲ့ကြောင်းနှင့် ကျူးလွန်သူများအား မသိရသေးကြောင်းသိရသည်။
ဂျင်
(ပုံစာ- အသတ်ခံခဲ့ရသည့် ဇနီးမောင်နှံ)

စစ်အာဏာသိမ်းယူပြီး နှစ်နှစ်ကာလအတွင်း အခြေခံအလုပ်သမားအခွင့်အရေးများ ပိုမိုဆုံးရှုံးလာ (ရန်ကုန်၊ ဇွန် ၁၆)

Friday, June 16th, 2023

စစ်အာဏာသိမ်းယူပြီးသည့်နောက် နှစ်နှစ်ကာလအတွင်း အခြေခံ အလုပ်သမားအခွင့်အရေးများ ပိုမိုဆုံးရှုံးလာကြောင်း ပြည်တွင်းအလုပ်သမားအရေးကူညီဆောင်ရွက်နေသူများထံမှ သိရသည်။
ယခင်က အလုပ်သမားသမဂ္ဂများ လွတ်လပ်စွာဖွဲ့စည်းနိုင်ခွင့်အပါအဝင် အလုပ်သမားများ၏ လွတ်လပ်စွာထုတ်ဖော်ပြောဆိုနိုင်မှု ၊ လွတ်လပ်စွာဆန္ဒထုတ်ဖော်နိုင်မှုနှင့် အလုပ်သမားအရေးကူညီဆောင်ရွက်သူများ များပြားခဲ့သော်လည်း လက်ရှိတွင် အလုပ်သမားတက်ကြွလှုပ်ရှားသူများကို ဖမ်းဆီးခြင်းအပါအဝင် အလုပ်သမားသမဂ္ဂဖွဲ့စည်းမှုများကို ဖျက်သိမ်းလိုက်ခြင်းကြောင့်ဖြစ်ကြောင်းသိရသည်။
“အလုပ်သမားအခွင့်အရေးက ဒီစစ်အာဏာရှင်လက်ထက်မှာ ပိုပြီးတော့ ဆုံးရှုံးလာတယ်။ ပြည်တွင်းက အလုပ်သမားသမဂ္ဂတွေဆိုတာ မရှိတော့ဘူး။ ရှိနေတဲ့အဖွဲ့တွေကိုတောင် စစ်တပ်နဲ့ ထောက်လှမ်းရေးက လိုက်ဖမ်းလို့ ပြေးနေရတာရှိတယ်။ အဲဒီတော့ အလုပ်သမားအရေး ကူညီမယ့်သူဆိုတာမရှိတော့ဘူး “ဟု လှိုင်သာယာမြို့နယ်ရှိ အလုပ်သမားအရေးကူညီရေးဆောင်ရွက်ခဲ့သူတစ်ဦးက ပြောသည်။
ယင်းကဲ့သို့ အလုပ်သမားအခွင့်အရေးကူညီဆောင်ရွက်ပေးသူနည်းပါးလာခြင်းအပေါ်တွင် အခွင့်ကောင်းယူ၍ အလုပ်ရှင်များသည်အလုပ်သမားအခွင့်အရေးများကို ပြောင်ပြောင်တင်းတင်းချိုးဖောက်လာကြောင်းဆိုသည်။
” အလုပ်သမားအရေးကူညီဆောင်ရွက်နေသူတွေမရှိတော့ဘူးဆိုကတည်းက အလုပ်ရှင်တွေက အလုပ်သမားအခွင့်အရေးတွေကို ပြောင်ပြောင်တင်းတင်းကို ချိုးဖောက်လာကြတာ။ မီးဖွားခွင့်တွေဆိုရင် အပြည့်အဝမရတော့ဘူး။ ကုန်ဈေးနှုန်းတက်လို့ လစာလေးတိုးတောင်းရင်တောင် မပေးနိုင်ဘူး။ မင်းတို့သတ္တိရှိရင် ဆန္ဒပြ၊ ရဲခေါ်ပြီး မင်းတို့ကို ဖမ်းခိုင်းမယ်ဆိုပြီးတော့ ပြောတာမျိုးအထိရှိတယ်”ဟု ဒဂုံအရှေ့မြို့နယ်ရှိ အလုပ်သမားအရေးကူညီရေးဆောင်ရွက်သူတစ်ဦးက ပြောသည်။
ပြီးခဲ့သည့် ၂၀၂၁ ခုနှစ် စစ်အာဏာရှင်တော်လှန်ရေးဆန္ဒပြမှုများတွင် အလုပ်သမားအရေးကူညီဆောင်ရွက်သူများက အနယ်နယ်အရပ်ရပ်ရှိ အလုပ်သမားများကို စုစည်းကာ ပါဝင် ဆန္ဒပြမှုများ လုပ်ဆောင်ခဲ့သည့်အပေါ်တွင် စစ်ခေါင်းဆောင်များက မကျေနပ်၍ အလုပ်သမားအရေးကူညီဆောင်ရွက်သူများကို ဖိနှိပ်လျက်ရှိနေခြင်းဖြစ်ကြောင်း အလုပ်သမားအရေးကူညီဆောင်ရွက်သူများက ဆိုသည်။
ဂျင်

မြဝတီ-ရန်ကုန် အာရှလမ်းပိုင်းတွင် အကြမ်းဖက်စစ်‌ကောင်စီ တပ်ဖွဲ့ဝင်များက အနုကြမ်းစီးမှုများပြုလုပ်နေ (မြဝတီ၊ ဇွန် ၁၅)

Thursday, June 15th, 2023

လုံခြုံရေးကို အကြောင်းပြပြီး အကြမ်းဖက်စစ်ကောင်စီတပ်ဖွဲ့ဝင်များက မြဝတီ-ရန်ကုန် အာရှလမ်းပိုင်းတွင် သွားလာနေသော မော်တော်ယာဉ်များအား အနုကြမ်းစီးငွေကြေးတောင်းခံမှုများပြုလုပ်နေကြောင်း အဆိုပါ လမ်းကြောင်းအသုံးပြုနေသူများ၏ ပြောပြချက်အရ သိရသည်။
အဆိုပါ လမ်းကြောင်းတွင် ယခင်က လမ်းကြောင်းအနုကြမ်းစီးများ နှင့် တိုင်းရင်းသားလက်နက်ကိုင်တပ်ဖွဲ့ဝင်များအား ငွေကြေးပေးဆောင်ရခြင်းမရှိသော်လည်း အာဏာသိမ်းပြီးသည့်နောက်တွင် အကြမ်းဖက်စစ်ကောင်စီတပ်သားများအပါအဝင် စစ်ကောင်စီလက်အောက်ခံ လက်နက်ကိုင်အဖွဲ့များက မော်တော်ယာဉ်တစ်စီးလျှင် ငွေကျပ်တစ်သောင်းခွဲနှုန်းကောက်ခံခြင်း၊ တင်ဆောင်လာသည့် ပစ္စည်းများအပေါ်မူတည်၍ ငွေကြေးတောင်းခံခြင်းနှင့် တင်ဆောင်လာသည့် ပစ္စည်းများကိုပါ တောင်းခံခြင်းများလည်းရှိနေသည်ဟုဆိုသည်။
” အခုက ရန်ကုန်ကနေ-မြဝတီ သွားဖို့ဆိုရင် ဂိတ်တွေက အဆင့်ဆင့် ပေးရတယ်။ အနည်းဆုံးက တစ်ဂိတ်ကို တစ်သောင်းခွဲပေးရတယ်။ မပေးဘူးဆိုရင် ကားရပ်ပြီးတော့ ဆင်းခိုင်းတယ်။ စစ်တာဆေးတာလုပ်တယ်။ မသင်္ကာရင် ဖုန်းတွေဘာတွေစစ်ပြီးတော့ နှိပ်စက်ညှင်းပန်းတာတွေလုပ်တယ်။ ညဘက်တွေဆိုရင် ဆီဆိုင်တွေမှာ ညအိပ်တဲ့ကားတွေကို ဧည့်စာရင်းအကြောင်းပြလိုက်စစ်တယ်။ သူတို့မသင်္ကာတဲ့သူတွေဆိုရင် နိုပ်စက်ညှင်းပန်းတာတွေလုပ်တယ်။ ပြီးရင် ငွေတောင်းပြီးတော့မှ ပြန်လွှတ်ပေးတာတွေလည်းရှိတယ်”ဟု အဆိုပါလမ်းကြောင်းအားအသုံးပြုနေသူ ယာဉ်မောင်းတစ်ဦးက ပြောသည်။
မြဝတီ-အာရှလမ်းမကြီးသည် ထိုင်းနိုင်ငံမှ အကြောင်းအမျိုးမျိုးကြောင့် ပြန်လာသော ရွှေ့ပြောင်းမြန်မာအလုပ်သမားများ အများဆုံးသွားလာရာ လမ်းကြောင်းဖြစ်ပြီး အကြမ်းဖက်စစ်ကောင်စီတပ်ဖွဲ့ဝင်များသည် အဆိုပါအလုပ်သမားများထံမှ ငွေညှစ်မှုများလည်းရှိကြောင်း ကိုယ်တွေ့ကြုံခဲ့ရသူ ရွှေ့ပြောင်း မြန်မာအလုပ်သမားတစ်ဦးက ပြောသည်။
” အဓိကတော့ မှတ်ပုံတင်တွေကို စစ်တယ်။ မှတ်ပုံတင်ထဲမှာ စစ်ကိုင်းတို့၊ မကွေးတို့ ပါနေရင်သူတို့ နှစ်သိန်း ၊ သုံးသိန်းတောင်းတယ်။ မပေးရင် စစ်တာဆေးတာတွေလုပ်တယ်။ ဖားခုန်ခိုင်းတာတို့၊ နားရွက်ဆွဲပြီး ထိုင်ထလုပ်ခိုင်းတာတို့၊ သူတို့စိတ်မကြည်တဲ့သူဆိုရင် ခြေထောက်နဲ့ကန်ကျောက်တာတွေလုပ်တယ်။ ပြီးတော့ အိတ်တွေဘာတွေစစ်တယ်။ ငွေထုတ်ပါလာတာမြင်ရင် စစ်သား နှစ်ယောက်၊ သုံးယောက်က ဝိုင်းလာပြီးတော့ ငွေတောင်းတာတွေရှိတယ်”ဟု ထိုင်းနိုင်ငံမှပြန်လာသောမြန်မာအလုပ်သမားတစ်ဦးက ၎င်း၏ ကိုယ်တွေ့ဖြစ်ရပ်အား ပြန်လည်ပြောသည်။
ဂျင်
(ပုံစာ- မြဝတီ-ရန်ကုန် အာရှလမ်းမကြီး တနေရာတွင် သွားလာနေသော မော်တော်ယာဉ်တချို့အား တွေ့ရစဉ်….။)

မယ်စဲ့တွင် တိုက်ပွဲဖြစ်နေ၍ ထိုင်းနိုင်ငံအတွင်းသို့ ဒေသခံ ၃၀၀၀ ကျော်ထွက်ပြေးတိမ်းရှောင်နေရ (ကရင်နီ၊ ဇွန် ၁၅)

Thursday, June 15th, 2023

ကယား(ကရင်နီပြည်နယ်)၊ ထိုင်း-မြန်မာ နယ်စပ်ရှိ မယ်စဲ့မြို့နယ်အတွင်း ကရင်နီတပ်မတော်(KA)၊ ကရင်နီအမျိုးသားကာကွယ်ရေးတပ်ဖွဲ့ KNDF အပါအဝင် ပူးပေါင်းတပ်ဖွဲ့များနှင့် အကြမ်းဖက်စစ်ကောင်စီတပ်တို့ကြား တိုက်ပွဲများဖြစ်ပွားလာခြင်းကြောင့် ဒေသခံ ၃၀၀၀ ကျော်သည် ထိုင်းနိုင်ငံ၊ မဲဟောင်ဆောင်ခရိုင်အတွင်းသို့ ထွက်ပြေးတိမ်းရှောင်နေကြရလျက်ရှိကြောင်း သိရသည်။
ပြီးခဲ့သည့် ဇွန်လ ၁၃ ရက်နေ့၌ သံလွင်မြစ်အရှေ့ဘက်ခြမ်းရှိ အကြမ်းဖက်စစ်ကောင်စီ၏ ရှေ့တန်းစခန်း ၃ နှင့် မယ်စဲ့ ရဲစခန်းတို့ကို တော်လှန်ရေးအင်အားစုများ ထိုးစစ်ဆင်တိုက်ခိုက်ပြီးနောက် မယ်စဲ့ နှင့် ဖားဆောင်းမြို့နယ်တို့တွင် ယနေ့အချိန်အထိ ထိုဒေသများ တိုက်ပွဲများဖြစ်ပွားနေ၍ ဒေသခံများက ထိုင်းနိုင်ငံအတွင်းသို့ ထွက်ပြေးတိမ်းရှောင်နေကြရခြင်းဖြစ်သည်။
May be an image of 10 people
“ကျွန်တော်တို့ ခန့်မှန်းထားချက်အရ ဒေသခံက ၃၀၀ဝ ကျော်လောက်ရှိတယ်။ အရင်ကတော့ ထိုင်း-မြန်မာ နယ်စပ်က ဒုက္ခသည်စခန်းမှာပဲ ခိုလှုံနေကြတာပေါ့။ အခုကတော့ ထိုင်းနိုင်ငံထဲကို ထွက်ပြေးတိမ်းရှောင်ကြရတဲ့ အခြေအနေပေါ့” ကရင်နီပြည်နယ်အတွင်း စစ်ဘေးရှောင်ဒုက္ခသည်အရေး ဆောင်ရွက်နေသူတစ်ဦးက ပြောသည်။
ယခုထိုင်းနိုင်ငံအတွင်းသို့ ထွက်ပြေးတိမ်းရှောင်ရသူများထဲတွင် ဒီမော့ဆို့၊ ဖရူဆို နှင့် ဘော်လခဲ မြို့နယ်တွင် တိုက်ပွဲများဖြစ်ပွားနေ၍ မယ်စဲ့မြို့နယ်အတွင်း၌ ထွက်ပြေးခိုလှုံနေကြရသူများလည်း ပါဝင်ကြောင်း ၎င်းက ဆိုသည်။
၎င်းက ဆက်လက်၍ ” အခုက အခက်အခဲဖြစ်တာက သူတို့စားနပ်ရိက္ခာပဲပေါ့။ စစ်ဘေးရှောင်အရေအတွက်က ပိုပိုတိုးနေတာလေ ” ဟု ပြောဆိုသည်။
ပြီးခဲ့သည့် ဇွန်လ ၁၃ ရက်နေ့ နံနက်ပိုင်းတွင် သံလွင်မြစ်အရှေ့ဘက်ခြမ်းရှိ စစ်ကောင်စီ၏ ရှေ့တန်းစခန်း ၃ ခုဖြစ်သော တောင်လှ၊ မယ်တနွယ် နှင့် BP 14 စခန်းတို့ကို တော်လှန်ရေးအင်အားစုများက တိုက်ခိုက်သိမ်းပိုက်ခဲ့ပြီး မောင်းပြန်သေနတ် ၄၀ ခန့် နှင့် ၁၂၀ မမ လက်နက်ကြီး တချို့ကို သိမ်းဆည်းရမိခဲ့ကြောင်း ကရင်နီပြည်နယ် စစ်ဖက်ဆိုင်ရာ သတင်းထုတ်ပြန်ရေးအဖွဲ့ထံမှ သိရသည်။
အဆိုပါ စခန်းသိမ်းတိုက်ပွဲများအတွင်း ရှေ့တန်းစခန်း ၃ ခုစလုံးကို တိုက်ခိုက်သိမ်းယူနိုင်ခဲ့ပြီး တော်လှန်ရေးအင်အားစုများ ပြန်လည်ဆုတ်ခွာခဲ့ရလမ်းကြောင်း တချို့ကို အကြမ်းဖက်စစ်ကောင်စီဘက်က လေကြောင်းမှ လိုက်လံတိုက်ခိုက်လျက်ရှိကြောင်း ကရင်နီဒေသရှိ သတင်းရင်းမြစ်တဦးက Spring of Burma (SOB) သို့ ပြောသည်။
၎င်းက ဆက်လက်၍ ” အခုကတော့ ဆက်သွယ်ရေးအခက်အခဲတချို့ဖြစ်နေတော့ အကျအဆုံးစာရင်းတွေ သေချာမသိရသေးဘူး။ စစ်ကောင်စီက ကျွန်တော်တို့တပ်ဖွဲ့တွေ ပြန်ဆုတ်တဲ့ လမ်းကြောင်းတွေကို လေကြောင်းကနေ လိုက်ပစ်နေတယ် ” ဟု ဆိုသည်။
ယခု တိုက်ပွဲများသည် အကြမ်းဖက်စစ်ကောင်စီ၏ ရှေ့တန်းစစ်စခန်းများကို KA အပါအဝင် ပူးပေါင်းတပ်ဖွဲ့များကဘက်က ယခုနှစ်အတွင်း ပထမဆုံးအကြိမ် ပြန်လည်ထိုးစစ်ဆင် တိုက်ခိုက်ခြင်းလည်းဖြစ်သလို ကရင်နီပြည်နယ်ကြားကာလ အုပ်ချုပ်ရေးကောင်စီဖွဲ့ ဖွဲ့စည်းပြီးနောက် ဖြစ်ပေါ်လာသော စခန်းသိမ်းတိုက်ပွဲများလည်း ဖြစ်သည်။
မယ်စဲ့ရဲစခန်းအပါအဝင် အကြမ်းဖက်စစ်ကောင်စီ၏ ရှေ့တန်းစခန်းကုန်းများကို ပူးပေါင်းတပ်ဖွဲ့များ ဝင်ရောက်တိုက်ခိုက်ခြင်းကို အတည်ပြုသော်လည်း လတ်တလောအခြေအနေအရ စစ်ရေးသတင်းများကို အသေးစိတ်ပြောဆို၍ မရသေးကြောင်း KNDF ၏ ပြောရေးဆိုခွင့်ရှိသူတဦးက ပြောဆိုသည်။
” တိုက်ပွဲတွေ ဖြစ်ပွားခဲ့တာ မှန်ကန်ပါတယ်။ ဒီတိုက်ပွဲမှာ KNDF က ပါတယ်ဆိုပေမဲ့ သက်ဆိုင်ရာ EAO တွေရဲ့ ဦးဆောင်မှုနဲ့ သွားတာဖြစ်တဲ့အတွက် သူတို့ဘက်က ထုတ်ပြန်လာပါလိမ့်မယ် ” ဟု ၎င်းက ဆိုသည်။
အကြမ်းဖက်စစ်ကောင်စီသည် ပြီးခဲ့သည့် ၂၀၂၃ခုနှစ် ဖေဖော်ဝါရီလမှစ၍ ကရင်နီပြည်နယ်အတွင်းရှိ ပင်လောင်းမြို့နယ်၊ ရှားတောမြို့နယ်၊ ဒီးမော့ဆိုမြို့နယ်နှင့် ဘောလခဲမြို့နယ်အသီးသီးတို့မှ စစ်မျက်နှာ (၄) ခုဖွင့်ကာ စုစုပေါင်း စစ်ကြောင်း (၁၂) ကြောင်းဖြင့် အပြင်းအထန် ထိုးစစ်ဆင်တိုက်ခိုက်လာခဲ့သော်လည်း ကရင်နီပူးပေါင်းတပ်ဖွဲ့များ၏ ခုခံတိုက်ခိုက်များကြောင့် တပ်ရင်းမှူးအဆင့် အရာရှိများ အပါအဝင် ထိခိုက်အကျအဆုံးများပြားနေလျက်ရှိသည်။
နှစ်နှစ်တာကာလအတွင်း၌ ကရင်နီပြည်နယ်တွင် တိုက်ပွဲပေါင်း ၁၀၀၀ ကျော်ဖြစ်ပွားခဲ့ပြီး အကြမ်းဖက်စစ်ကောင်စီတပ်သားပေါင်း ၁၀၆၅ ဦးကျဆုံးခဲ့ပြီး ၄၁ ဦးကို အရှင်ဖမ်းဆီးမှုများလည်း ရှိခဲ့သည့်အပြင် ရှေ့တန်းစခန်း (၁၀) ခု နှင့် စစ်ဆေးဂိတ်တချို့ကို တိုက်ခိုက်သိမ်းပိုက်နိုင်ခဲ့ကြောင်း ကရင်နီအမျိုးသားများကာကွယ်ရေးတပ် (KNDF )က မေလကုန်ပိုင်းတွင် ထုတ်ပြန်ထားသည်။
ပြီးခဲ့သည့် ဧပြီလ ၅ ရက်ကနေ့လည်း ကရင်ပြည်နယ် မြဝတီမြို့နယ်၊ ရွှေကုက္ကိုမြို့သစ်ရှိ စစ်ကောင်စီ တပ်စခန်းများကို (KNLA) တပ်ဖွဲ့က ဝင်ရောက်တိုက်ခိုက်ခဲ့ရာမှ နှစ်ဖက်တိုက်ပွဲဖြစ်ပွားခဲ့ရာ ဒေသခံ ၁ သောင်းကျော်တို့သည် ထိုင်းနိုင်ငံ၊ မဲဆောက်မြို့သို့ ထွက်ပြေးခိုလှုံခဲ့ရသည်။
မောင်ထွန်းငယ်
Photo ; AEC ASEAN News

မိုးဗြဲတွင် အကြမ်းဖက်စစ်ကောင်စီက ဒေသခံ ၂၆ ဦးကို အစုလိုက်အပြုံလိုက် သတ်ဖြတ်ခဲ့ နိုင်ငံတကာက အရေးယူပေးဖို့ NUG ထုတ်ပြန်တောင်းဆို (မိုးဗြဲ၊ ဇွန် ၁၅)

Thursday, June 15th, 2023

ရှမ်းပြည်တောင်ပိုင်း၊ မိုးဗြဲမြို့နယ်ရှိ ဒေသခံရွာသား ၂၆ ဦးအား အကြမ်းဖက်စစ်ကောင်စီတပ်ဖွဲ့ဝင်များက ရက်ရက်စက်စက် အစုလိုက်၊ အပြုံလိုက်သတ်ဖြတ်ခဲ့သည့်အတွက် နိုင်ငံတကာက အရေးယူပေးဖို့ အမျိုးသား ညီညွတ်ရေးအစိုးရ NUG က ထုတ်ပြန်တောင်းဆိုလိုက်သည်။
ရွာသား ၁၄ ဦးမှာ ဇွန်လ ၆ ရက်မှ ၈ ရက်အတွင်း မိုးဗြဲမြို့၊ စေတီတော်အနီးတွင် အကြမ်းဖက်စစ်ကောင်စီတပ်ဖွဲ့ဝင်များ၏ မညှာမတာ၊ အစုလိုက်အပြုံလိုက် ပစ်သတ်ခြင်းခံခဲ့ရပြီး တချိန်တည်းမှာပင် မိုးဗြဲမြို့အနီးတွင်လည်း အကြမ်းဖက်စစ်ကောင်စီတပ်ဖွဲ့က မော်တာနှင့် ပစ်ခတ်ခဲ့မှုကြောင့် ဒေသခံ ၁၂ ဦး ထပ်မံ အသက်ဆုံးရှုံးခဲ့ရခြင်းဖြစ်ကြောင်း ဇွန်လ ၁၄ ရက်တွင် NUG က ထုတ်ပြန်ထားသည်။
ပြီးခဲ့သည့် မေလ ၂၅ ရက်နေ့ကစပြီး ဇွန်လ ၁၂ ရက်နေ့အထိ မိုးဗြဲမြို့နယ်အတွင်း အကြမ်းဖက်စစ်ကောင်စီတပ်နှင့် ကရင်နီ ပူးပေါင်းတပ်ဖွဲ့တို့ တိုက်ပွဲများပြင်းထန်စွာဖြစ်ပွားခဲ့ခြင်းဖြစ်သည်။
အရပ်သားခြောက်ဦး၏ ရုပ်အလောင်းများကို ရှမ်းရွာသားများက ရှာဖွေတွေ့ရှိခဲ့ပြီး နောက်ထပ် ငါးဦး၏ ရုပ် အလောင်းများကိုမူ စစ်ကောင်စီတပ်ဖွဲ့ဝင်များဘက်မှ အပစ်ခံရမည့်အန္တရာယ်များကြောင့် ပြန်လည်ယူဆောင်၍ မရရှိသေးကြောင်း သိရသည်။
သေဆုံးသူတစ်ဦး စေတီတော်ဝန်းအတွင်း၌လဲကျစဉ် ဦးခေါင်းကို သေနတ်နှင့် ပစ်သတ်ခံရသည်ကို ဒရုန်း ဗီဒီယိုဖိုင်တွင် မြင်တွေ့ရပြီး နောက်ထပ်သေဆုံးသူ သုံးဦးမှာ ၎င်းတို့အား ဒူးထောက်ခိုင်းကာ ပစ်သတ်ခံခဲ့ရခြင်းဖြစ်ကြောင်း ရုပ်အလောင်းများ၏ပုံစံအနေအထားများအရ တွေ့ရသည်ဟု ဖော်ပြထားသည်။
ယင်းကဲ့သို့ လူများအစုလိုက်အပြုံလိုက်သတ်ဖြတ်သည့် အကြမ်းဖက်စစ်ကောင်စီတပ်ဖွဲ့ဝင်များသည် ရက်စက်ကြမ်း ကြုတ်သော ရာဇ၀တ်မှုများအတွက် တာဝန်ခံရမည်ဖြစ်ပြီး နိုင်ငံတကာအသိုက်အဝန်းများ၊ အပြည်ပြည် ဆိုင်ရာ အဖွဲ့အစည်းများ အထူးသဖြင့် အိမ်နီးချင်းနိုင်ငံများအနေဖြင့်လူသားမျိုးနွယ်အပေါ် ကျူးလွန် သည့် ရာဇ၀တ်မှုများကို အဆုံးသတ်ရန်နှင့် ကျူးလွန်သူများအား တရားမျှတမှုရှိစေရန် ဆောင်ရွက်ပေးဖို့လည်း NUG က တောင်းဆိုထားသည်။
NUG ၏ လူ့အခွင့်အရေးဝန်ကြီးဌာနမှ ထုတ်ပြန်သော စာရင်းများအရ ၂၀၂၁ ခုနှစ် ဇူလိုင်လမှ ၂၀၂၃ ခုနှစ် ဇွန်လ ၇ ရက်နေ့အတွင်း အကြမ်းဖက်စစ်ကောင်စီက အစုလိုက်အပြုံလိုက် သတ်ဖြတ်မှု ၈ဝ ကျော် ကျူးလွန်ခဲ့ပြီး လူပေါင်း ၁ဝ၅၈ဦး သေဆုံးခဲ့ကြောင်း သိရသည်။
(ပုံဟောင်း -အကြမ်းဖက်စစ်ကောင်စီတပ်မှ လေယာဉ်ဖြင့် ဗုံးကြဲခဲ့သည့် မိုးဗြဲအနောက်ခြမ်းတစ်နေရာ/PKPF)

မန္တလေးက ရွှေဆိုင်တချို့ စစ်ဆေးခံရပြီးနောက် ရွှေစျေး ကျပ် ၃၁ သိန်းကျော်လာ (ရန်ကုန်၊ ဇွန် ၁၅)

Thursday, June 15th, 2023

ပြည်တွင်းရွှေစျေးနှုန်း မြင့်တက်လာခြင်းကြောင့် မန္တလေးတိုင်းရှိ အောင်သမာဓိ နှင့် အကယ်ဒမီ အစရှိသော နာမည်ကြီး ရွှေဆိုင်တချို့မှ ရွှေလုပ်ငန်းရှင်များကို အကြမ်းဖက်စစ်ကောင်စီက ခေါ်ယူစစ်ဆေးမေးမြန်းခြင်းများ လုပ်ဆောင်ခဲ့ပြီးနောက် ရွှေ တစ်ကျပ်သားလျှင် ကျပ် ၃၁ သိန်း ၃ သောင်းကျော်အထိ မြင့်တက်လာခဲ့ကြောင်း ပြည်တွင်းရွှေစျေးကွက်အတွင်းမှ စုံစမ်းသိရှိရသည်။
ရန်ကုန်မြို့လသာလမ်းရှိ ရွှေဆိုင်ပိုင်ရှင်တဦးက ” အဓိကက ရွှေစျေး သိန်း ၃၀ ကျော်လာလို့ ရွှေဆိုင်တွေကို စစ်ဆေးမေးမြန်းတော့ လန့်ပြီး စျေးက ပိုတက်ကုန်တာ။ ဒီနေ့ဆို ရွှေဆိုင်တချို့တောင် ပိတ်ထားရတယ်။ စျေးဖွင့်တာလည်း နောက်ကျတယ်” ဟု ပြောသည်။
လတ်တလောတွင် ပြည်တွင်းဒေါ်လာစျေးနှုန်းသည်လည်း ပြီးခဲ့သည့်လကုန်ပိုင်းမှ စတင်ကာ ၁ ဒေါ်လာလျှင် ကျပ် ၂၉၇၀ မှ ကျပ် ၃၀၀၀ အထိ ပြန်လည်မြင့်တက်လာခြင်းကြောင့် ပြည်တွင်းရွှေစျေးနှုန်းများ ဆက်တိုက်မြင့်တက်လာခြင်းဖြစ်သည်။
အထက်ပါ ရွှေလုပ်ငန်းရှင်က ” ကမ္ဘာ့ရွှေစျေးက ဒီရက်ပိုင်းထဲ ပြန်တောင်ကျနေတာ။ အမှန်ဆို ရွှေစျေးကလည်း လိုက်ကျရမှာ။ ဒါပေမယ့် ဒေါ်လာစျေးကလည်း ဆက်တက်၊ တဖက်မှာကလည်း ဖမ်းမယ်ဆီးမယ်ဆိုတော့ ရွှေစျေးက ပိုမြင့်နေတာ” ဟု ဆိုသည်။
ပြီးခဲ့သည့် သီတင်းပတ်၌ ပြည်တွင်းရွှေစျေးနှုန်းသည် ကျပ်သိန်း ၃၀ ကျော်ဝန်းကျင်သာ ရှိခဲ့ရာမှ ယခု နှစ်ရက်အတွင်း ကျပ် တစ်သိန်းကျော်အထိ စျေးနှုန်းမြင့်တက်လာခြင်းဖြစ်သည်။
ရန်ကုန်တိုင်းရွှေလုပ်ငန်းရှင်အသင်းကမူ ယနေ့(ဇွန် ၁၅ရက်) ရွှေစျေးကွက်အပိတ်စျေးနှုန်းကို ကျပ် ၂၂ သိန်း ၇ သောင်းကျော်ဖြင့် စျေးကွက်ပိတ်ခဲ့သည်။
အကြမ်းဖက်စစ်ကောင်စီသည် ပြည်တွင်းရွှေစျေးနှုန်း နှင့် ဒေါ်လာလဲလှယ်နှုန်းများ၏ စျေးသတ်မှတ်ချက်များကို လိုက်လံကန့်သတ်ထားလျက်ရှိပြီး လတ်တလောတွင် ပြည်တွင်းရွှေစျေးနှုန်းကို ကျပ်သိန်း ၃၀ ထက်ပိုမရောက်စေရန် ရွှေလုပ်ငန်းရှင်များကို ဖိအားနေလျက်ရှိသည်။
မောင်ထွန်းငယ်
ဓာတ်ပုံ – Shwe Sin FB Page

မြို့ပြစစ်ဆင်ရေးအတွက် ပုဂံပြည်ဘီလူးတပ် အထူးကွန်မန်ဒိုတပ်သားများ၏ ပုံရိပ်တချို့။

Thursday, June 15th, 2023

မြို့ပြစစ်ဆင်ရေးအတွက်
ပုဂံပြည်ဘီလူးတပ် အထူးကွန်မန်ဒိုတပ်သားများ၏ ပုံရိပ်တချို့။
Photo – BAGAN OGRE SPECIAL FORCE

ယခုနှစ် ခြောက်လအတွင်း သေဒဏ်နှင့် ထောင်ဒဏ်တစ်သက် ချမှတ်ခံရသောနိုင်ငံရေး အကျဥ်းသားပေါင်း ၆၉ ဦးရှိ (ရန်ကုန်၊ ဇွန် ၁၅ )

Thursday, June 15th, 2023

စစ်အုပ်စုက အကြမ်းဖက်မှုတိုက်ဖျက်ရေးပုဒ်မများဖြင့် ယခုနှစ် ခြောက်လအတွင်း၌ သေဒဏ်နှင့် ထောင်ဒဏ်တစ်သက်တစ်ကျွန်းခံချမှတ်ခံရသူပေါင်း ၆၉ ဦးအထိရှိကြောင်း နိုင်ငံရေးအကျဉ်းသားများ ကူညီစောင့်ရှောက်ရေးအသင်း(AAPP)က ယမန်နေ့က သတင်းထုတ်ပြန်ထားသည်။
ထောင်ဒဏ်တစ်သက်တစ်ကျွန်း ချမှတ်ခံထားရသူများထဲတွင် အမျိုးသမီး (၇) ဦးနှင့် အမျိုးသား (၄၇) ဦး စုစုပေါင်း (၅၄) ဦးနှင့်သေဒဏ်ချမှတ်ခံထားရသူထဲတွင် အမျိုးသမီး (၄) ဦးနှင့် အမျိုးသား (၁၁) ဦး စုစုပေါင်း (၁၅) ဦးတို့ပါဝင်ကြောင်း သိရသည်။
လတ်တလောတွင် နွေဦးတော်လှန်ရေးနှင့်ဆက်စပ်၍ သေဒဏ်ချမှတ်ခံထားရပြီး အကျဉ်းထောင်များတွင် ထိန်းသိမ်းခံနေရသူ စုစုပေါင်း (၁၁၅) ဦးရှိလာသည့်အပြင် စစ်ခုံရုံးများက မျက်ကွယ်သေဒဏ်ချမှတ်ခံထားရသူပေါင်း (၄၂) ဦးအထိရှိ၍ သေဒဏ်ချမှတ်ခံထားရသူ စုစုပေါင်း (၁၅၇) ဦးအထိရှိလာပြီဖြစ်ကြောင်း AAPP က ထုတ်ပြန်ထားသည်။
၂၀၂၃ ခုနှစ်၊ ဇန်နဝါရီလမှ ဇွန်လဒုတိယပတ်အထိ AAPP က နိုင်ငံတဝန်း၌ ကောက်ယူထားသော သတင်းအချက်အလက်များအရ သေဒဏ်နှင့် ထောင်ဒဏ်တစ်သက်တစ်ကျွန်းခံချမှတ်ခံရသူများ အပါအဝင် စစ်ကောင်စီ၏ လက်အောက်ခံတရားရုံးများမှ မတရားပုဒ်မများဖြင့် ထောင်ဒဏ်ချမှတ်ခံထားရသူ အမျိုးသမီး (၁၀၈) ဦး၊ အမျိုးသား (၆၂၀) ဦးနှင့် လိင်စိတ်ခံယူမှု ကွဲပြားသူ (၂) ဦး စုစုပေါင်း (၇၃၀) ဦးအထိရှိနေသည်။
ပြီးခဲ့သည့် ဇွန်လ ၉ ရက်နေ့တွင်လည်း မန္တလေးတိုင်း၊ ပြင်ဦးလွင်မြို့နယ်ရှိ မေမြို့အိမ်စားသောက်ဆိုင်ပိုင်ရှင်၊ ပရဟိတသမား မပိုပြည့်သူကို ပြင်ဦးလွင်ခရိုင်တရားရုံးမှ အကြမ်းဖက်မှုတိုက်ဖျက်ရေးဥပဒေပုဒ်မ ၅၀ (ည) ဖြင့် ထောင်ဒဏ် ၁၅ နှစ် ထပ်မံချမှတ်ခဲ့၍ သူမသည် လတ်တလောတွင် စုစုပေါင်း ထောင်ဒဏ် ၄၃ နှစ်ကျော် ချမှတ်ခံထားရသည်။
လက်ရှိအချိန်အထိ ၂၀၂၁ ခုနှစ်၊ ဖေဖော်ဝါရီလ ၁ ရက်နေ့ မတရားစစ်အာဏာလုမှုဖြစ်စဉ်ကို ဆန့်ကျင်ခဲ့ကြသော ဒီမိုကရေစီရေး လှုပ်ရှားသူများနှင့် ပြည်သူများ၏ နွေဦးတော်လှန်ရေးကာလအတွင်း ကျဆုံးခဲ့ရသူ စုစုပေါင်းမှာ (၃၆၅၉) ဦး အထိရှိပြီး ၁၉၀၀၁ ဦးမှာ အကျဉ်းထောင်အသီးသီး၌ ထိန်းသိမ်းခံနေရဆဲဖြစ်ကြောင်း AAPP က ဆိုထားသည်။
မောင်ထွန်းငယ်